दमक, मंसिर ४
हाल सर्वाधिक चर्चामा रहेको‘पूर्णबहादुरको सारङ्गी’ ले हालसम्म ३६ करोड बढी रुपैयाँ कमाई गरेको छ ।
कार्तिक १५ देखि प्रदर्शनमा आएको गन्धर्व समूदायको विषयलाई उठान गरिएको कारुणिक सो चलचित्र प्रदर्शनको तेस्रो सातामा पनि आक्रमक कमाई गरिरहेको छ । अहिले ३०० भन्दा धेरै शोसहित प्रदर्शनरत चलचित्रले नेपाली बक्स अफिसमा ३६ करोड बढी आम्दानी पुर्याउन सफल भएको छ । जुन हालसम्म कुनैपनि नेपाली चलचित्र नगरेको कमाई हो ।
वितरण कम्पनी ब्यांकटेस इन्टरटेनमेन्टले १८ दिनमा चलचित्रले ३५ करोड ९६ लाख रुपैयाँ कमाएको बताएको छ । आइतबार मात्रै चलचित्रले १ करोड ६० लाख ग्रस गरेको थियो ।
विजय बराल, अञ्जना बराइली, मुकुन भुसाल, प्रकाश सपुत, माओत्से गुरुङ, बुद्धि तामाङ, विनोद न्यौपाने, बालकलाकार स्वयम् केसीसहितको अभिनय रहेको सो चलचित्रले बाबुले छोराको भविष्यका लागि गर्ने संघर्ष र त्यागको कथा उठाएको छ ।
रोज पौडेलको लेखन र निर्देशनको सो चलचित्रमा विनोद पौडेल र प्याट्रिक सुवेदी निर्माता रहनु भएको छ । रमेश चौलागाईं, हरि श्रेष्ठ र रमेश ढकाल कार्यकारी निर्माता हुनुहुन्छ । चलचित्रमा प्रशान्त शिवाकोटीको संगीत, हेमन्त कान्छा रसाइलीको सारंगी वादन तथा प्रशान्त शिवाकोटी, मेलिना राई र पुष्पन प्रधानको स्वर रहेको छ ।
चलचित्र सेभेन सिज इन्टरटेनमेन्टले १ करोड ३० लाख लगानीमा निर्माण गरेको हो ।
