दमक, मंसिर ७
सरकारको नेतृत्व गरिरहेको नेकपा एमालेले आफूलाई सरकार सञ्चालनमा अवरोध गर्ने गरी घेराबन्दी गरेको भन्दै शुक्रबार (आज) जनतालाई जगाउने जागरण सभाको नाममा काठमाडौँमा शक्ति प्रदर्शनमा गर्ने भएको छ ।
काठमाडौँ, ललितपुर र भक्तपुर जिल्ला कमिटीको आयोजनामा काठमाडौँको दरबारमार्गमा जागरण सभा गर्दै एमालेले हालसम्म सरकारले गरेका उपलब्धि र उठेका प्रश्नको जवाफ समेत दिने भएको छ ।
प्रमुख प्रतिपक्ष लगायत विपक्षी दलहरूले सरकारको काम कारबाही र कार्यशैलीको आलोचना गर्दै संघर्षका कार्यक्रम चलाइरहेका बेला सत्तारूढ दलमात्रै नभएर सरकारको नेतृत्वकर्ता दल एमाले नै सडकमा शक्ति प्रदर्शनमा उत्रन लागेको हो ।
एमाले विधिको शासनमा र कानुनी राज्यको मान्यतामा विश्वास गर्छ भन्ने सन्देश दिन जागरण सभा गर्न लागेको दाबी गर्दै जनवर्गीय सङ्गठनहरू युवा संघ नेपाल, अनेरास्ववियु, अनेम संघ, जिफन्ट, सम्पर्क मञ्चलगायत सबैजसो जनसङ्गठनलाई प्रदर्शनमा अनिवार्य उपस्थितिका लागि निर्देशन दिइएको छ ।
प्रधानमन्त्रीसमेत रहनु भएका पार्टी अध्यक्ष केपी शर्मा ओली र महासचिव शंकर पोखरेलले सभालाई सम्बोधन गर्ने तयारी छ ।
काठमाडौँपछि देशैभर जागरण सभा आयोजना गर्ने तयारीमा एमाले रहेको छ ।
