बीएण्डसीमा एमबीबीएसको पठनपाठन अघि बढ्दै, पूर्वेलीमा उत्साह

दमक, मंसिर ९
राष्ट्रिय चिकित्सा शिक्षा आयोगबाट स्वीकृति प्राप्त भएपछि झापाको बीएण्डसी मेडिकल कलेजले चिकित्सा शास्त्रअन्तर्गत एमबीबीएसको पठनपाठनको तयारी पूरा गरी विद्यार्थी भर्ना कार्य अघि बढाएको छ । आफ्नै ठाउँमा एमबीबीएस पढ्न पाउने भएकोमा पूर्वका विद्यार्थीहरुमा खुसी छाएको छ ।

कलेजले आवश्यक जनशक्ति, भौतिक पूर्वाधार र शैक्षिक सामग्रीको व्यवस्था गरिसकेपछि काठमाडौं विश्वविद्यालयको सम्बन्धनमा हाल विद्यार्थी भर्ना कार्य सुरु भएको छ । आयोगले बीएण्डसीलाई चालु शैक्षिकसत्रका लागि ५० जना विद्यार्थी पढाउन पाउने सिट निर्धारण गरे अनुरुप विद्यार्थी भर्ना चलिरहेको कलेजका जनसम्पर्क अधिकृत प्रमेश गिरीले जानकारी दिनु भयो । तर कलेजमा एक सय ५० विद्यार्थीलाई सहज रूपमा पठनपाठन गराउने पुग्नेगरीको व्यवस्था मिलाएको उल्लेख छ ।

कलेजले मेचीनगर नगरपालिका-१२ धाइजनमा विद्यार्थीलाई पठनपाठन गराउन पाँचतले ‘बेसिक साइन्स ब्लक’ तयार गरेको छ । उता, ‘क्लिनिकल साइन्स’ का लागि विर्तामोड नगरपालिका-५ स्थित बीएण्डसी हस्पिटलमा व्यवस्था मिलाइएको गिरीले बताउनु भयो ।
सर्वोच्च अदालतले २०८० चैत १३ गते बीएण्डसीलाई सम्बन्धन दिन परमादेश जारी गरेको थियो । अस्पतालसहितको सो कलेज दुर्गा प्रसाईको अगुवाईमा स्थापना भएको हो ।