दमक, मंसिर १३
दमक अस्पतालको बेड नम्बर १३ । महिलाको एउटा ख्याउटे शरीर तंग्रिने प्रयत्नमा बेडमा लडिरहेको छ । पर्याप्त खान नपाएझैं लाग्ने उनको ओठ मुख पनि सुकेको छ । तर यही छेउमा एकजना हँसिलो बच्चा खेलिरहेको छ । गोरो अनुहार, काला आँखा । जोसुकैलाई पनि देख्ने बित्तिकै बोकिहालौं, खेलाईहालौं जस्तो लाग्छ । कमजोर शारीरिक अवस्थाकी उहाँलाई दमक अस्पतालमा उपचारका लागि ल्याइएको हो ।
पाँचौ सन्तानको रुपमा छोराको जन्म दिने यी महिलाको परिवर्तित नाम हो माया दर्जी । उमेर करिव ३५ वर्ष । उहाँको घर ठेगाना थाहा छैन । अहिलेसम्म उहाँले जति पनि बच्चा जन्माउनु भयो, कसैको पनि बाबु को हो भन्ने उहाँलाई थाहा छैन ।
दमक अस्पतालले दर्जीसँग कुरा गर्दा यो छैटौं सन्तान भएको जानकारी भयो । पछिल्लो पटक दमक नगरपालिकाले सञ्चालन गरेको सेफ हाउसमा बस्दै आउनु भएकी दर्जीलाई अहिलेको सन्तान पेटमा भएको तेस्रो महिनादेखि नै नियमित स्वास्थ्य परीक्षण भइरहेको थियो । अस्पतालको प्र्रत्यक्ष निगरानीमा रहेकोले सकेसम्म आमा र बच्चालाई स्वस्थ बनाउने काम गरेको दमक अस्पतालका मेडिकल सुपरिटेण्डेण्ट कृष्ण शाहले बताउनु भयो ।
छौटौ सन्तानको रुपमा छोरा जन्माउनु भएकी दर्जीको साथमा भने अहिले दुईजना छोराहरु छन् । एकजना दमक अस्पतालको समेत सहयोगमा रहेको बाल आश्रममा राखिएको छ । त्यसपछि जन्मेको छोरो सेफ हाउसमा र अहिले जन्मेको छोरो काखमा छन् । त्यसअघिका सन्तान चाँहि कहाँ छन् दर्जीलाई पनि पत्तो छैन ।
दमकको बसपार्कमा वेवारीसे अवस्थामा भेटिनुभएकी दर्जीलाई उद्धार गरेर दमक नगर नगरपालिकाले सेफ हाउसमा राखेको थियो । त्यहाँ राखेपछि दर्जीले आफ्नो सन्तानको हेरचाह गर्न सक्नु भएको छ भने नगरपालिकाले पौष्टिक खानेकुरा समेत प्रदान गरिरहेको नगरपालिकाको महिला तथा बालबालिका शाखाकी अधिकृत सरिता भण्डारीले जानकारी दिनुभयो ।
भण्डारीका अनुसार दर्जीको आमा सम्पर्कमा हुनुहुन्छ । आमा समेत वेवारिसे ढंगले सडकमा बसेको थाहा पाएपछि उद्धार गरी अहिले आमा र छोरीलाई नै सेफ हाउसमा राखिएको छ । दर्जीले जन्माएका सन्तानहरु हुर्कदै गएपछि केही केही पुरुषहरु मेरो सन्तान हो भन्दै दावी समेत गर्न आउने गरेको भण्डारीले बताउनु भयो । ‘तर प्रमाण कानुनी प्रमाणबिना हामीले दर्जीको कुनैपनि सन्तान कसैलाई दिएका छैनौंं ।’ भण्डारीको भनाई छ ।
