दमक, मंसिर १९
चीनको औपचारिक भ्रमणमा रहनु भएका प्रधानमन्त्री केपी शर्मा ओलीले बेल्ट एण्ड रोड इनिसियिटिभ (बीआरआई) बाट नेपाललाई लाभ पुग्ने बताउनु भएको छ । यस सन्दर्भमा आज बीआरआई सहकार्यको फ्रेमवर्कमा हस्ताक्षर समेत भएको छ ।
चीनको पेकिङ विश्वविद्यालयमा यसअघि बिहान भएको कार्यक्रममा प्रधानमन्त्री ओलीले नेपालको विकासमा चीनको दरिलो साथ भइरहेको अवस्थामा बीआरआईमार्फत नेपाललाई लाभ पुग्ने बताउनु भएको थियो । चीनिया राष्ट्रपति सी जिनफिङको दुरदर्शी नेतृत्वमा सुरु भएको बीआरआई परियोजनाबाट दुई मुलुकको आपसी सम्बन्ध अझै गाढा हुने विश्वास व्यक्त गर्नुभएको थियो ।
आगामी सन् २०२५ मा नेपाल र चीनबीच कूटनीतिक सम्बन्ध स्थापना भएको ७० वर्ष पुग्ने छ । सो अवसरमा दुई देशमा उच्चस्तरीय भ्रमण आदानप्रदान भइ पारस्परिक सम्बन्धमा नयाँ आयाम थपिने समेत प्रधानमन्त्री ओलीको विश्वास छ ।
ओलीले नेपाल र चीन दुवै प्राचीन ज्ञानका भूमि भएको बताउँदै आपसी सम्बन्ध पुरानो र प्रगाढ भएको समेत अभिव्यक्ति दिनु भयो ।
