दमक, मंसिर २०
आज बिहीबारबाट प्रदर्शनमा आएको दक्षिण भारतीय चलचित्र ‘पुष्पा २’ ले नेपालका हलहरु कब्जा गरेको छ ।
हल सञ्चालकहरुले दर्शकको रोजाइमा परिरहेका नेपाली चलचित्रहरु उतारेर ‘पुष्पा २’ लाई ऐतिहासिक संख्यामा शो दिएका छन् ।
दशैंयता नेपाली चलचित्रहरुले हलहरुमा उच्च व्यापार गरिरहेका थिए । ‘छक्कापञ्जा ५’, ‘१२ गाउँ’, हुँदै ‘पूणर्बहादुरको सारंगी’ सम्म आइपुग्दा हलहरुले करोडौंको ब्यापार गरेका छन् । अहिले पनि हलमा ‘पूणर्बहादुरको सारंगी’ सँगै ‘ह्रस्व-दीर्घ’ र ‘तेल भिसा’ चलिरहेका थिए, तर हलहरुले यी तीनवटै नेपाली चलचित्रलाई नगण्य शो दिएर हिन्दी चलचित्र ‘पुष्पा २’ लाई अधिक शो दिएका छन् ।
देशभरका १६६ हलमा ‘पुष्पा २’ ले ५९१ शो पाएको छ । नेपालकै ठूलो मल्टिप्लेक्स चेन क्यूएफएक्सले यस चलचित्रलाई काठमाडौंभित्र मात्रै ८१ शो दिएको छ । बिहान ४ः३० देखि राति १२ बजेसम्मको शो दिइएको छ ।
