विराटनगर, माघ ५
नेकपा माओवादी केन्द्रका अध्यक्ष एवम् पूर्व प्रधानमन्त्री पुष्पकमल दाहाल प्रचण्डले मोरङको ग्रामथान २ झोराहाट आएर ज्येष्ठ नागरिकलाई सम्मान गर्नुभएको छ ।
शुक्रबार साँझ मोरङ आइपुग्नु भएका प्रचण्डले ग्रामथान गाउँपालिकामा आयोजना हुने सभालाई सम्बोधन गर्ने क्रमसँगै सर्वाधिक ज्येष्ठ नागरिकलाई सम्मानित गर्नुभएको हो ।
उहाँले १०६ वर्षीय बखतबहादुर कार्की र पदमप्रसाद पौडेल, ९७ वर्षीय कुलदीप मण्डल, ८२ वर्षीय गंगादेवी लुइँटेल र ८० वर्षीय सिछाइ मुसहरलाई सम्मान व्यक्त गर्दै उहाँहरुको दीर्घ जीवनको कामना गर्नुभयो ।
सम्मानपछि बोल्दै अध्यक्ष प्रचण्डले अग्रजलाई सम्मान गर्ने परम्परा ह्रास हुँदै गएको परिवेशमा नव पुस्ताले उहाँहरुको मर्मलाई बुझ्न र सम्मान परिवेश अघि बढाउन आवश्यक रहेको बताउनु भयो । उहाँले ज्येष्ठ नागरिक जीवन्त इतिहास भएकाले उहाँहरुबाट समाज विकासका लागि हरेक क्षेत्रले प्रेरणा लिनुपर्ने बताउँदै भन्नुभयो ‘आजको पुस्ताले अग्रज पुस्ताबाट अनुभव र प्रेरणा लिएर समाजलाई गति दिनुपर्छ । अनि ज्येष्ठ नागरिकको सम्मान र सुरक्षाका लागि राज्य, समुदाय र परिवार संवेदनशील हुनुपर्छ ।’
साथै उहाँले शनिबार नै गिरिजाप्रसाद कोइराला क्रिकेट रङ्गशालाको अनुगमन गर्दै होटल एसियाटिकमा आयोजित एक कार्यक्रममा सहभागी हुने कार्यतालिका थियो ।
अध्यक्ष प्रचण्डले बिहान विराटनगरको ठूलोमिल चोकबाट तिनपैनी–जलजला चोक–अस्पताल चोक–जिल्ला प्रशासन कार्यालय क्षेत्रमा मर्निङ वाक गर्दै राजवंशी समुदायको भक्काको स्वाद लिएको समेत लिएको उल्लेख छ ।
