गोरखा — जिल्लामा कोरोना संक्रमितको संख्या दिनदिनै बढ्दो छ । दुई साताको अवधिमा जिल्लामा २ सय ९९ जनामा कोरोना संक्रमण पुष्टि भइसकेको छ । संक्रमितमध्ये १३ जना निको भएका छन् ।
जिल्लामा अहिले २ सय ८४ जना संक्रिय संक्रमित रहेको स्वास्थ्य कार्यालय गोरखाका सूचना अधिकारी नवराज खड्काले बताए ।
स्वास्थ्य कार्यालयका अनुसार २ संक्रमितको मृत्यु भएको छ । पालुङ्टार नगरपालिका-२ की ६९ वर्षीया महिला र गोरखा नगरपालिकाका-११ का ४३ वर्षीय पुरुषको मृत्यु भएको उनले बताए । कोरोनाको तेस्रो लहरको फैलावट तीव्र देखिएको खड्काले बताए ।
‘संक्रमण गाउँसम्मै पुगेको छ,’ उनले भने, ‘भाइरस सक्रिय र छिटो फैलने स्वभावको छ । यस्तो बेला जनस्वास्थ्यको मापदण्ड पालनामा लापरबाही गर्न भएन ।’ जिल्लाका ११ वटै स्थानीय तहमा सक्रिय संक्रमण देखिएको छ ।
सबैभन्दा बढी गोरखा नगरपालिकामा १ सय ५८ सक्रिय संक्रमित छन् । दुर्गमको चुमनुव्री गाउँपालिकामा पनि शुक्रबार दुई जनामा संक्रमण पुष्टि भएको खड्काले बताए ।
शुक्रबार ७० जनाको एन्टिजेन गर्दा ३२ जनामा कोरोना संक्रमण देखियो । एन्टिजेन र पीसीआर दुवै विधिमार्फत कोरोना परीक्षण भएको कार्यालयले जनाएको छ । गाउँगाउँसम्म कोरोना पुगेको सहिद लखन गाउँपालिकाका स्वास्थ्य शाखाप्रमुख वीरेन्द्र श्रेष्ठले बताए ।
संक्रमण जोखिम बढेसँगै पहिलो र दोस्रो लहरमा स्थापना भएको पालिका र वडास्तरीय कोभिड-१९ प्रतिकार्य समितिलाई पनि सक्रिय बनाइएको उनले बताए । प्रतिकार्य समितिले होम आइसोलेसनमा बसेकाको निगरानी गर्ने, स्वास्थ्य समस्या देखिए कोरोना परीक्षणको व्यवस्था मिलाउने काम गर्दै आएको छ ।
‘२५ जनाभन्दा बढी भेला नहुने निर्देशन छ, प्रतिकार्य समूहले गाउँमा भोजभतेर वा कुनै कार्यमा पनि निगरानी गर्छ,’ श्रेष्ठले भने । संक्रमितको स्वास्थ्य अवस्था बुझेर जटिल भए स्वास्थ्य संस्थासम्म पुर्याउने गरी प्रतिकार्य समितिलाई सक्रिय बनाइएको उनले बताए । ‘मिल्दोजुल्दो लक्षण देखिए तत्काल कोरोना परीक्षण हुने गरी व्यवस्था मिलाएका छौँ,’ उनले भने ।
