दमक, माघ ८
दमक ६ नम्बर वडा कार्यालयले पुरुष तथा महिलाहरुलाई स्वदेशमै स्वरोजगार बन्न अभिप्रेरित गर्दै विभिन्न कार्यक्रम सञ्चालनको शिलशिलामा पछिल्लो समय २ वटा सीपमूलक तालिम सञ्चालन गरेको छ ।
वडाले प्रोफाइल युनिसेक्स सलुनको प्राविधिक सहयोगमा ४५ दिने आधारभूत हेयर कटिङ र ग्यारेज बारिस्ता स्कुलको प्राविधिक सहयोगमा कफि बनाउने बारिस्ता सम्बन्धीको १ महिने तालिम मंगलबार प्रारम्भ गरेको हो ।
उद्घाटन कार्यक्रममा ६ नम्बर वडाध्यक्ष टेकबहादुर थापाले सिकेको सीपलाई प्रयोग नगरेमा तालिममा लागेको खर्च फिर्ता लिनेसम्मको नीति बनाइएको जानकारी गराउँदै व्यवसायिक बन्नका लागि वडाले केही बीउ पुँजी समेत दिने र बजारीकरणमा सघाउने समेत प्रतिवद्धता व्यक्त गर्नुभयो ।
कार्यक्रममा बारिस्ता स्कुलका छत्र विक्रम र प्रोफाइल युनिसेक्स सलुनकी प्रोप्राइटर लक्ष्मी शिवाकोटीले तालिमका सन्दर्भमा आफ्ना कुरा राख्दै तालिम प्रभावकारी रुपमा सञ्चालन गर्ने जनाउनु भयो ।
