दमक, माघ १८
दमक उद्योग वाणिज्य संघको शुक्रबार ३३ औं वार्षिक साधारणसभा सम्पन्न भएको छ ।
संघको सभाहलमा आयोजित साधारणसभाको नेपाल उद्योग वाणिज्य महासंघ कोशी प्रदेश अध्यक्ष राजेन्द्र राउतले उद्घाटन गर्नुभयो । उहाँले व्यवसायिक हकहितका लागि सरकारले थप ध्यान दिनुपर्ने धारणा राख्नु भयो ।
कार्यक्रममा दमक उद्योग वाणिज्य संघका अध्यक्ष देवीप्रसाद गुरागाईं गोपालले व्यवसायिक हकहितका लागि संघबाट हरतरहले काम गर्ने प्रयत्न भइरहेको जनाउनु भयो ।
अध्यक्षकातर्फबाट प्रस्तुत भिडियो प्रतिवेदनमा संघको इतिहास र भएका गतिविधिको संक्षिप्त जानकारी गराइएको छ । झापा उद्योग वाणिज्य संघको शाखाका रुपमा २०३५ सालमा खडा भएको संघ ०४७ मा नेपाल उद्योग वाणिज्य महासंघको सदस्यता लिएर छुट्टै संस्थाका रुपमा अघि बढ्न पुग्यो । ०५८ मा इलम प्रशिक्षण केन्द्रको जग्गा प्राप्तिपछि इलम सम्बन्धी तालिमका गतिविधि अघि बढेको जनाइएको छ ।
संघका बरिष्ठ उपाध्यक्ष एवम् कार्यक्रम संयोजक राजु खड्काले सहभागिलाई शव्दले स्वागत गर्दै ६ हजार बढी सदस्यको एकतामा संघ दर्बिलो बन्दै गएको जनाउनु भयो ।
सो अवसरमा बिक्रमकुमार शाहसहितका हालसम्मका १३ जना आजिवन सदस्यलाई प्रमाणपत्र वितरण गरिएको छ ।
कार्यक्रममा, नेपाल उद्योग वाणिज्य महासंघका केन्द्रीय सदस्य गोकुल श्रेष्ठसहित विभिन्न संघ, संस्था र पार्टी प्रतिनिधिहरुको आतिथ्यता रहेको थियो ।
