विराटनगर, माघ ३०
प्रेस चौतारी नेपाल कोशी प्रदेश समिति दोस्रो अधिवेशन २०८१ द्वारा बुधबार १३ बुँदे विराटनगर घोषणापत्र जारी गरेको छ ।
मोरङ जिल्लाको ऐतिहासिक तथा औद्योगिक शहर विराटनगरमा आयोजित दोस्रो प्रदेश अधिवेशन भव्यताका साथ सम्पन्न गर्दै बन्दसत्रले घोषणापत्र जारी गरेको हो । घोषणापत्र लेखन कार्यको गोपाल काफ्लेको संयोजनमा हिमाल दाहाल र चिना थापा सदस्य रहनु भएको थियो ।
घोषणापत्रमा निम्न बुँदा उल्लेख छ :
१, मुलुकमा क्रियाशील सम्पूर्ण राजनीतिक शक्ति, तिनका भातृ संघ संगठन एवम् सामाजिक संघ संस्थाहरुलाई संविधानप्रदत्त प्रेस तथा अभिव्यक्ति स्वतन्त्रता रक्षाका लागि प्रतिबद्ध हुन अधिवेशन ध्यानाकर्षण गराउदछ ।
२, नेपाल सरकारले राष्ट्रपतिबाट प्रमाणित गराई जारी गरेको सामाजिक सञ्जाल व्यवस्थापनसम्बन्धि अध्यादेशलाई चालु संसदमा पेश गरी व्यापक छलफल पछि ऐन बनाउन जोडदार माग गर्दछ ।
३, कोशी प्रदेश सरकारले बनाएको प्रदेशको आमसञ्चार सम्बन्धमा व्यवस्था गर्न बनेको विधेयक स्वागतयोग्य छ । प्रस्तावित विधेयकमाथि व्यापक छलफल गरी यसै अधिवेशनमा पारित गरी चालु आर्थिक वर्षबाटै कार्यान्वयनमा ल्याउन प्रदेश सरकारसमक्ष यो अधिवेशन आग्रह गर्दछ ।
४, सञ्चार संस्था, प्रतिष्ठान तथा पेशागत संगठनहरुमा महिला, दलित तथा सीमान्तकृत समुहको अर्थपूर्ण सहभागिताको लागि यो अधिवेशन माग गर्दछ । ५) स्थानीय सरकारबाट प्रकाशन/प्रशारण गरिने विज्ञापनहरु प्रकाशन/प्रशारण गर्ने पहिलो हक सोही स्थानका सञ्चार माध्यमहरुले पाउनुपर्छ । यसको कार्यान्वयनका लागि सम्पूर्ण पालिकाहरुलाई यो अधिवेशन ध्यानाकर्षण गराउँदछ ।
६, अनलाइन न्यूज पोर्टलहरुलाई पनि संघीय सरकारले उपलब्ध गराउने लोक कल्याणकारी विज्ञापन प्रदान गरेर स्थानीय मिडियाहरुलाई बचाउन यो अधिवेशन जोडदार माग गर्दछ ।
७, समृद्ध नेपाल सुखी नेपालीको राष्ट्रिय आकांक्षा पूरा गर्ने अभियानमा सक्रियतापूर्वक क्रियाशील हुन सबै सञ्चारकर्मीहरुलाई आग्रह गर्दछ ।
८, पत्रकारहरुको भौतिक तथा पेशागत सुरक्षाका लागि तीनै तहका सरकार र यसका अंगहरुको ध्यानाकर्षण गराउँदछौं ।
९, जिम्मेवार पत्रकार, जवाफदेही पत्रकारिताको मर्मलाई अंगिकार गर्न यस कोशी प्रदेशका सबै पत्रकारहरुमा ध्यानाकर्षणसहित आग्रह गर्दछौं ।
१०, पछिल्लो समयमा आम सञ्चार माध्यममा प्रकाशित सामग्रीलाई लिएर पत्रकारविरुद्ध विद्युतिय अपराध (साइबर क्राइम)मा मुद्दा चलाउने सम्बन्धित निकायको दुराशायपूर्ण कदमप्रति यो अधिवेशनको गम्भिर ध्यानाकर्षण भएको छ ।
११, पछिल्लो समय कोशी प्रदेशभित्र देखिएका पहिचानसम्बद्ध आन्दोलनहरुलाई वार्ता र संवादको माध्यमबाट तत्काल समाधान गर्न संघीय तथा प्रदेश सरकारसमक्ष आग्रह गर्दछौं । १२, आउँदो २०८२ साललाई कोशी प्रदेश सरकारले पर्यटन वर्ष मनाउन गरेको घोषणालाई सफल बनाउन यो अधिवेशन समर्थन गर्दछ ।
१३, विराटनगर महानगरको समृद्धिका लागि आवश्यक सहयोग गरिदिन संघीय सरकारसमक्ष यो अधिवेशन माग गर्दछ ।
झापाका संस्थापक र पहिलो अध्यक्ष सम्मानित
यसैबीच, अधिवेशनले झापाको प्रेस चौतारीका सस्थापक अध्यक्ष नेत्र पाठकलाई मरणोप्रान्त र पहिलो अध्यक्ष माधब बिद्रोहीलाई सम्मान गरेको छ । पाठकको सम्मान उहाकी बुहारी हिमा लुइटेलले ग्रहण गर्नु भएको थियो । कार्यक्रममा चौतारीका केन्द्रीय अध्यक्ष गणेश बस्नेत, एमाले नेता राजेन्द्र गौतम, कोशी प्रदेश अध्यक्ष घनश्याम खतिवडासहितले उहाँहरुलाई सम्मानित गर्नुभएको हो ।
