दमक, फागुन २१
साना सहयोगी समूह नेपाल दमकले शिक्षा, स्वास्थ्य हुँदै हाल देशभर खानेपानीकोे क्षेत्रमा कार्यक्रम अघि बढाएको छ । यसक्रममा पछिल्लो समय मोरङको उर्लाबारीका चार ठाउँमा खानेपानी फिल्टर गर्ने पीआरओ प्युरिफाइ मेसिन वितरण गरेको छ ।
उर्लाबारीको नमुना बाल गृह, उर्लाबारी बहुमुखी क्याम्पस, जीवन बचाउ उपचार सेवा गृह र ज्येष्ठ नागरिक एकता समन्वय केन्द्रकालागि एक/एक थान खानेपानी फिल्टर मेसिन वितरण भएको वितरक संस्थाका अध्यक्ष मिलन आचार्यले जनाउनु भयो । एचडीएनपीको आर्थिक व्यवस्थापनमा त्यसखाले कार्यक्रम अघि बढाइएको हो ।
आचार्यले शिक्षा, स्वास्थ्य र खानेपानीका क्षेत्रमा देशभर काम गर्दै आइरहेको उल्लेख गर्नुभयो । पछिल्लो समय खानेपानीको क्षेत्रमा समेत काम गर्ने क्रममा देशभर २५ हजार ८ सय रुपैयाँ पर्ने ६० वटा फिल्टर वितरण गर्ने कार्यक्रम रहेको प्रष्ट्याउनु भयोे ।
सो कार्यक्रममा उर्लाबारी बहुमुखी क्याम्पस प्रमुख खेमराज कार्की, जीवन वचाउ उपचार सेवा गृहका सञ्चालक पवन थापा, नमूना बाल गृहकी अध्यक्ष मीना बरालसहितलाई सामग्री हस्तान्तरण गरिएको छ ।
सो अवसरमा बोल्दै उर्लाबारी नगरपालिकाका पूर्व प्रमुख खड्ग फागोले सबैले सहयोग पुर्याउन आवश्यक उर्लाबारीका यसखाले संघ संस्थालाई शुद्ध खानेपानीकालागि सहयोग पुर्याएकोमा वितरक संस्थालाई धन्यवाद व्यक्त गर्नुभयो ।
यसखाले कार्यक्रमले अनाथ आश्रममा रहेका ६८ जना बालबालिकालाई शुद्ध खानेपानीकालागि सहयोग पुगेकोमा नमुना बाल गृहकी अध्यक्ष मीना बरालले खुसी व्यक्त गर्नुभयो ।
