दमक, चैत ४
झापाको दमक नगरपालिकामार्फत सञ्चालित दमक अस्पतालमा स्वास्थ्यका सेवाहरु थपिँदै उपचारमा प्रभावकारिता बढ्दै गएको छ । यसक्रममा सोमबारबाट आकस्मिक (इमर्जेन्सी) प्रयोगशाला सेवा समेत सञ्चालनमा आएको छ ।
सेवाको दमक नगर प्रमुख रामकुमार थापाले उद्घाटन गर्दै यसखाले सेवाले सबैलाई सहजता प्रदान गर्ने विश्वास व्यक्त गर्नुभयो ।
यसखाले प्रयोगशालाले आपतकालिन अवस्थामा छिटो र प्रभावकारी सेवा प्रदान गर्नेछ । विरामीको अवस्था हेरेर १ देखि डेढ घण्टाभित्रमा विभिन्नखाले ल्याबका जाँच सम्पन्न गरिने अस्पतालका ल्याब विभाग इञ्चार्ज लोकु पौडेलले जनाउनु भयो ।
प्रशासन प्रमुख तथा सूचना अधिकारी डाक्टर अनुपम घिमिरेले अस्पतालमा रहेका प्रयोगशालाका सामग्रीलाई व्यवस्थापन गर्दै इमरजेन्सी कक्षमा चौविसै घण्टा सञ्चालनमा हुने त्यसखाले प्रयोगशाला खडा गरिएको जानकारी गराउनु भयो । उहाँले काठमाडौं उपत्यकाबाहिरका पालिकाहरुका अस्पतालमा थोरै मात्रले आकस्मिक प्रयोगशाला सञ्चालनमा ल्याउन सकेको समेत उल्लेख गर्नुभयो ।
दमक अस्पतालमा दमक नगर तथा आसपासका पालिका र जिल्लाहरु समेतबाट दैनिक १ हजार २ सय जनासम्म विरामी आउने गरेका छन् ।
