काठमाडौँ । नेकपा एमालेले स्थानीय तहको निर्वाचन घोषणा गर्न सरकारलाई दबाब दिने भएको छ ।
सोमवार बसेको एमाले केन्द्रीय कार्यालयको बैठकले वैशाखभित्रै स्थानीय तहको निर्वाचनको मिति घोषणा गर्न सम्पूर्ण शक्तिका साथ सरकारलाई दबाब दिने निर्णय गरेको एमाले सचिव योगेश भट्टराईले जानकारी दिए ।
स्थानीय तहको निर्वाचनको मिति घोषणा गर्न सरकारलाई दबाब दिन देशव्यापी अभियान चलाउन जनसंगठनलाई निर्देशन दिने निर्णय गरेको उनले बताए । यसका लागि पार्टीका तर्फबाट सरकारको ध्यानाकर्षण गराइने र आवश्यक परे प्रधान मन्त्रीसमक्ष उच्चस्तरीय भेटघाट समेत गरिने निर्णय भएको उनले जानकारी दिए ।
केन्द्रीय कार्यालय बैठकले आसन्न स्थानीय निर्वाचनमा पार्टीका सम्पूर्ण मातहत कमिटीलाई तयारीमा जुट्न निर्देशन दिएको सचिव भट्टराईले जानकारी दिए । बैठकले सचिवालय बैठकमा पेश गर्ने एजेण्डा पनि तय गरेको छ । राष्ट्रियसभा निर्वाचनको मत परिणामलाई हेर्दा एमालेको मतसंख्या बढेको र गठबन्धनको औचित्य नरहेको देखिएकाले यसको समीक्षा सचिवालय बैठकमा गर्ने निर्णय भएको छ ।
त्यस्तै, १६ जिल्ला बाहेकका जिल्लामा भएको अधिवेशनले पार्टीलाई व्यवस्थित बनाएकाे भन्दै बैठकले प्रदेश कमिटीको निर्वाचनका सम्बन्धमा पनि सचिवालयमा छलफल गर्ने निर्णय गरेको पनि उनले जानकारी दिए ।
