हेटौंडा — नेपाल पत्रकार महासंघ मकवानपुर शाखामा आवद्ध पत्रकारहरूका लागि हेटौंडा उपमहानगरपालिकाले ५ लाख रुपैयाँका दरले दुर्घटना बीमा गरिदिएको छ ।
जिल्लाका एक सय ६४ जना पत्रकारको पाँच लाख रुपैयाँको दुर्घटना बीमाका लागि तिर्नुपर्ने प्रिमियम रकम एक लाख २२ हजार २ सय ७० रुपैयाँको चेक उपमहानगरपालिकाका मेयर हरिबहादुर महतले मंगलबार महासंघ मकवानपुर शाखालाई हस्तान्तरण गरेका थिए । ‘संचारकर्मीहरू जोखिममा रहेकाले उनीहरूको उपमहानगरपालिकाले दुर्घटना बीमा गरिदिएको हो‚’ उनले भने ।
यसैगरी पत्रकार महासंघ मकवानपुर शाखाले सञ्चालनमा ल्याएको ज्येष्ठ पत्रकार पेन्सन कोषमा हेटौंडा उपमहानगरपालिकाले पाँच लाख सहयोग गरेको छ । महासंघ मकवानपुर शाखाले गत वर्षबाट पेन्सन कोष स्थापना गरेर पेन्सनसमेत उपलब्ध गराउँदै आएको छ । गत आर्थिक वर्षदेखि पत्रकार महासंघले २० वर्ष काम गरेका र ६० वर्ष उमेर पुगेका जेष्ठ पत्रकारका लागि मासिक पेन्सन दिनका लागि सञ्चालनमा ल्याएको कोषमा थोरै भए पनि सहयोग पुगोस् भनेर सहयोग गरिएको मेयर महतले बताए ।
शाखाले ज्येष्ठ पत्रकार नवराज शर्मालाई गतवर्ष पेन्सन कोष स्थापना गरेर पेन्सन स्वरुप मासिक ४ हजार रुपैयाँ दिँदै आएको छ ।
पेन्सन कोषका लागि उपमहानगरपालिकाले अघिल्लो वर्ष दश लाख रुपैयाँ सहयोग गरेको थियो । उक्त रकमको ब्याजबाट पेन्सन उपलब्ध गराउँदै आएको छ ।
