इटहरी / सुनसरीको इटहरी स्थित पीपल चौकमा दुर्घटना हुँदा एक जनाको मृत्यु भएको छ । तरहराबाट इटहरीतर्फ आउँदै गरेको को १ ख ६१०८ नम्बरको तेलको ट्याङ्करमा सोही दिशाबाट आउँदै गरेको को १ ह ६४४१ नम्बरको ट्याम्पो पछाडिबाट ठक्कर हुँदा एकको मृत्यु भएको हो ।
मृत्यु हुनेमा धरान १५ बस्ने ५६ वर्षीय योगेन्द्र बजगाईँ रहेका छन् । दुर्घटनामा गम्भीर घाइते भएका उनको उपचारको लागि धरानस्थित वीपी कोइराला स्वास्थ्य विज्ञान प्रतिष्ठान लगिएपनि डाक्टरले मृत घोषणा गरेको प्रहरीले जनाएको छ । पूर्व क्षेत्रीय ट्राफिक प्रहरी कार्यालय इटहरीका अनुसार चार जना घाइते भएका छन् ।
घाइतेहरूमा ट्याम्पोमा सवार धरान १३ बस्ने ३४ निलु बर्मा, उनकै छोरी ११ बर्सिया निराशा बर्मा, ४ बर्सिया बिप्याङ्कि बर्मा सामान्य घाइते रहेका छन् । ती मध्ये निलुको अवस्था भने गम्भीर रहेको प्रहरीले जनाएको छ । यस्तै, अर्का घाइते अन्दाजी ४० वर्षीय रोशन बस्नेतको भने इटहरीमै रहेको सामुदायिक अस्पतालमा उपचार भइरहेको प्रहरीले जनाएको छ ।
ट्याङ्कर चालक बराहक्षेत्र ८ बस्ने ३४ वर्षीय लव नारायण चौधरीलाई इलाका प्रहरी कार्यालय इटहरीले नियन्त्रणमा लिएर घटनाबारे थप अनुसन्धान भइरहेको छ । ट्याम्पो तीव्र गतिका कारण दुर्घटना भएको प्रहरीले जनाएको छ ।
