झापा /
प्रदेश–१ सरकारको लगानीमा प्लान्ट जडान गरिएको अस्पतालले जनाएको छ । ९७ लाख २८ हजार लागतमा अक्सिजन प्लान्ट जडान गरिएको हो । जिल्ला अस्पतालमा अक्सिजन प्लान्ट जडान गर्न गत आर्थिक वर्षदेखि काम सुरु गरिएको थियो । जडान गरिएको प्लान्टले प्रतिदिन ३० सिलिन्डर अक्सिजन भर्नेछ ।
त्यस्तै ३५ वटा बेडमा एकैपल्ट अक्सिजन आपूर्ति गर्नेछ । यद्यपि अहिलेलाई भने उक्त प्लान्टबाट सिलिन्डरमा अक्सिजन मात्र भरिने छ । वेडमा अक्सिजन आपूर्ति भने निर्माणधीन पाँचथर अस्पतालको भवन सम्पन्न भएपछि मात्र हुने छ । वेडमा अक्सिजन आपूर्तिका लागि बन्दै गरेको भवनमा पाइपलाइन राखिएको छ ।
जिल्ला अस्पताल पाँचथरका प्रमुख डा.बुद्धिबहादुर थापाका अनुसार उक्त अक्सिजन प्लान्टबाट एकैपटक तीन वटा सिलिन्डर भर्न सकिनेछ । थापाका अनुसार एउटा सिलिन्डर भर्न ४० मिनेट समय लाग्ने छ ।
पाँचथर अस्पतालमा छिमेकी जिल्ला ताप्लेजुङ र तेह्रथुमको आठराई र फेदाप क्षेत्रका बिरामी उपचारका लागि आउने गर्दछन् । छिमेकी जिल्लाका मानिस विशेष गरी प्रशुती गराउन पाँचथर अस्पताल आउने अस्पतालले जनाएको छ ।
अक्सिजन प्लान्ट जडान भएसँगै अब अक्सिजनका सिलिन्डर भर्न झापा पठाउनुपर्ने बाध्यता हटेको अस्पतालका प्रमुख डा.थापाले बताए । यसअघि कोरोनाको दोस्रो लहरको समयमा जिल्लामा अक्सिजनको अभाव भएको थियो । अब त्यस्तो समस्या खेप्नु नपर्ने थापाको भनाइ छ ।
अस्पतालको निर्माणाधीन भवन सम्पन्न भएपछि आवश्यक पर्ने बिरामीका लागि बेडमै अक्सिजन पुग्ने पनि अस्पतालले जनाएको छ । तर, नयाँ भवनको निर्माण कार्य ढिलाइ भएको सरोकारवालाले बताए ।
भवन निर्माण ठेकेदार कम्पनीले आगामी चैत महिना सम्मका लागि तेस्रोपल्ट म्याद थपेको छ । जिल्ला समन्वय समितिका प्रमुख तथा अस्पताल विकास समितिका अध्यक्ष विष्णुप्रसाद सापकोटाले चाँडोभन्दा चाँडो काम सम्पन्न गर्न निर्माण कम्पनीलाई निरन्तर ताकेता गरिरहेको बताए ।
