दमक, २६ बैशाख | झापाको दमक नगरपालिकाले दमक चोकबाट ट्याक्सी स्ट्याण्ड दमक ७ को पशुहाटस्थित खुल्ला स्थानमा स्थानान्तरण गरेको एक बर्ष पुरा भएको छ । तर, हिड्दैछ पाईला मेट्दैछ भनेझै स्ट्याण्ड सारेको बर्षदिन नबित्दै दमक ७ मा उपलब्ध गराईएको स्ट्याण्ण छाडेर कतिपय ट्याक्सीहरु साबिककै स्थानमा बस्ने गरेका छन् । यस प्रति दमक नगरपालिकाका प्रमुख रामकुमार थापाले आपत्ति जनाउनुभएको छ ।
एक बर्षअघि दमकको मुख्य चोकमा रहेका ट्याक्सीहरुलाई व्यवस्थित रुपमा राख्ने भन्दै दमक ७ मा रहेको खुल्ला स्थानमा स्थानान्तरण गरियो । तर, स्थानान्तरणको केहि समयपछिनै सो स्थानमा केहि बाहेक अरु ट्याक्सीहरु पुरानै स्थानमा फर्किए ।
स्ट्याण्ड सारेको एक बर्ष पुरा भएको अवसरमा स्वरोजगार हलुका सवारी श्रमिक संस्थाले आयोजना गरेको एक कार्यक्रममा प्रमुख अतिथिका रुपमा रहनुभएका दमक नगर प्रमुख राम कुमार थापाले यसरी नगरले उपलब्ध गराएको स्थानमा आउन नमान्नेहरुलाई पाखण्डीको संज्ञा दिनुभएको छ ।
नगरपालिकाले अर्को स्थायी व्यवस्था नहुञ्जेलसम्मका लागि तत्काल व्यवस्थापन गर्नका लागि यो स्थान उपलब्ध गराईएको तर, केहि छुद्र नेताहरुको कारणले अहिले पुन समस्या निम्तिएको नगर प्रमुख थापाको आरोप छ ।
दोहोरो चरित्र देखाउनेहरुको दमकमा कमी नभएको बताउदै उहाले यस बिषयलाई जित हारको बिषय नबनाउँनपनि आग्रह गर्नुभयो ।
उता, स्वरोजगार हलुका सवारी श्रमिक संस्थाका अध्यक्ष बालकृष्ण श्रेष्ठले स्थानीय सरकारको कमजोरीकै कारण समस्या आएको बताउनुभयो । उहाले स्थानीय सरकारले तदारुकता देखाउने हो भने सबै समस्या समाधान हुने उल्लेख गर्नुभयो ।
स्ट्याण्ड सारेपछि पनि स्थानीय सरकारले तोकेको ठाउँमा आउन नमान्नेलाई भटाभट कार्बाही गर्ने हो भने पनि समस्या समाधान भएर जाने उहाको भनाइ थियो ।
यसैबिच, दमक चोकबाट ट्याक्सी स्ट्याण्ड दमक ७ को पशुहाटस्थित खुल्ला स्थानमा स्थानान्तरण गरेको एक बर्ष पुरा भएका अबशरमा स्वरोजगार हलुका सवारी श्रमिक संस्थाले हाल नगरले उपलब्ध गराएको ट्याक्सी स्ट्याण्डमा सरसफाई कार्यक्रमको समेत आयोजना गर्यो ।
सरसफाई कार्यक्रममा हलुका सवारीका सवारी धनि तथा चालक, ईलाका प्रहरी कार्यालय दमक, दमक ट्राफिक, स्थानीय संघ संस्थाका प्रतिनिधि लगायतको उपस्थिती थियो ।
