दमक ३१, बैशाख / के तपाई यातायात र मालवाहक साधनको चालक हो ? अनि त्यस्ता साधन चलाउदा ट्राफिक नियम बिपरीत चलाइरहनुभएको छ ? यदि त्यसो गर्दै हुनुहुन्छ भने दमक आसपासमा अब भने तपाईको लापरबाही र हेपाईको अन्त्य हुँदैछ ।
यस्तो क्रियाकलापमा संलग्नलाई दमकमा इलाका प्रहरी कार्यालय र ट्राफिक प्रहरी कार्यालयले विशेष अभियान नै सञ्चालन गरेर तपाईलाई कानुनको फन्दामा पारिरहेको छ । अब विचार गरेर मात्र साधन चलाउनुहोला, नत्र परिएला ट्राफिकको फन्दामा । विशेष गरि रातको समयमा ट्राफिक प्रहरी र नेपाल प्रहरीले बिशेष अभियाननै सञ्चालन गरिरहेको इलाका प्रहरी कार्यालय दमकका प्रमुख रामप्रसाद तिम्सिनाले जानकारी दिनुभयो ।
विशेष गरि दुई पांग्रे यातायातका साधनलाई त्यसको स्वरुप परिवर्तन गरि चलाउने, ध्वनी प्रदुषण हुने गरि तिब्र गतिमा चलाउने, हेलमेट नलगाई चलाउने लगायत बिभिन्न ट्राफिक नियम उल्लंघन गरि साधन चलाउनेहरुमाथि प्रहरीले एक्सन लिइरहेको हो । एक साताको अवधिमा यस्ता गतिविधिमा संलग्न १२० थान मोटरसाइकल प्रहरीले नियन्त्रणमा लिएको छ ।
जसबाट ७५ हजार रुपैयाँ राजश्व समेत असुल भएको छ भने त्यस्ता गतिविधिमा संलग्न चालकलाई कानुनी कारबाही गरेर नियन्त्रणमा लिइएका उनीहरुका साधन जिम्मा लगाइएको छ । यो अभियानमा कुनै सोर्स फोर्स नचल्ने र सिधै कानुनको कारबाही अघि बढ्ने तिम्सिनाको भनाई छ ।
झापाको दमकमा ट्राफिक नियम उल्लंघनका घटना बढ्न थालेको ब्यापक जनगुनासो पछि प्रहरी र ट्राफिक प्रहरीले संयुक्त अभियान सुरु गरेका छन् । विशेष गरि रातको समयमा मादक पदार्थ सेवन गरि साधन चलाउने, मोटरसाइकल मोडिफाई गरि चलाउने तथा ट्राफिक नियम उल्लंघन गर्नेहरुमाथि प्रहरीले एक्सन लिन सुरु गरेको हो ।
