दमक, ९ जेठ / मापसे अर्थात, मादकपदार्थ सेवन । ट्राफिक प्रहरीले मापसेमा त कारबाही गरिरहेको सुन्नुभएकै होला । अब, लापसे अर्थात लागुपदार्थ सेवन गर्नेमाथि पनि जाँच गरी कारबाही सुरु गरेको छ । गाँजा, चरेस, ट्याब्लेट लगायतका लागुपदार्थ सेवन गरेर यातायातका र माहवाहक साधन चलाउनेमाथि पनि झापामा ट्राफिक प्रहरीले कारबाही सुरु गरेको छ ।
झापाको दमकमा नेपाल यातायात मजदुर संघ हलुका सवारी चालक इकाई समितिले चालक तथा सहचालकको लागि स्वास्थ्य परीक्षण कार्यक्रम एवम् लागुऔषध सचेतनामूलक कार्यक्रम राखेको थियो । सो कार्यक्रममा चालकहरुलाई लापसे गरे/नगरेको चेकजाँच गरिएको थियो । सो क्रममा केही चालकले लागुऔषध सेवन गरी साधन चलाएको पाइएको छ । दमक अस्पतालसँगको सहकार्यमा चालकहरुको लापसे परीक्षण गरिएको थियो । बिगतमा पनि यसरी लापसे परीक्षण गर्दा केही चालकले लागुऔषध सेवन गरी साधन चलाएको पाइएको झापा ट्राफिक प्रमुख गणेश पौडेल बताउनुहुन्छ । पछिल्ला दिनहरुमा आएर भने यो संख्या घट्न थालेको उहाँको दाबी छ ।
किटको माध्यमबाट ल्याब टेक्निसियनले चालकको पिसाव चेक गर्ने र केही मिनेटभित्रै लापसे छ/छैन रिपोर्ट आउँछ । पिसाव चेकजाँचका क्रममा पोजेटिभ रिजल्ट आएका चालकलाई नियन्त्रणमा लिएर अनुसन्धान गरिन्छ ।
इलाका प्रहरी कार्यालय दमक प्रमुख डीएसपी रामप्रसाद तिम्सिना पछिल्लो समय लागुऔषध सेवनकर्ता चालकका कारण दुर्घटनाको जोखिम उच्च भइरहेको बताउनुहुन्छ । सेवनकर्ताबाटै बिभिन्न अपराधिक घटनाहरु हुने गरेको उहाँको भनाइ छ ।
चालकले लापसे गरेर लापरबाही तरिकाले सवारी चलाउँदा दुर्घटना बढी हुने सम्भावना हुन्छ । सचेतनाका लागि नै लापसे चेकजाँचमा ट्राफिक प्रहरीलाई सघाएको नेपाल यातायात मजदुर संघ हलुका सवारी चालक इकाई समिति दमकका उपाध्यक्ष भिम पौडेलले जनाउनु भयो ।
लागुऔषध सेवनले सेवनकर्ताको शारीरिक तथा मानसिक स्थितिमा परिवर्तन ल्याउँछ । यसको सेवन गरेर साधन चलाउँदा दुर्घटनाको समेत जोखिम हुने भएकाले नशालु पदार्थ सेवन गरी साधन नचलाउन ट्राफिक प्रहरीले सबै चालकहरुलाई आग्रहपनि गरेको छ ।
