दमक, १३ जेठ / पूर्व प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल प्रचण्डको नक्कल गरेर ‘नक्कली प्रचण्ड’ भनेर चिनिनु भएका हास्यकलाकार घनश्याम गौतम पछिल्लो २ बर्षदेखि क्यान्सर रोगले ओछ्यान पर्नुभएको छ ।
झापा घर भएर काठमाडौंमा कलाकारिता गर्दै गर्दा विरामी पर्नुभएका उहाँ काठमाडौं मेडिकल कलेजमा क्यान्सर रोगसँग लड्दै गरेको र उहाँलाई उपचारका लागि आर्थिक सहयोग आवश्यक रहेको कलाकार शिशिर भण्डारीले उल्लेख गर्नुभएको छ । भण्डारीले आफूले गौतमलाई अस्पतालमा भेटेर १५ हजार सहयोग प्रदान गर्दै उहाँको जीवन बचाउन सबै कलाकारले सक्दो सहयोग गर्न आवश्यक रहेको जनाएर सहयोगको आव्हाननै गर्नुभएको छ ।
थुप्रै रंगमञ्च, सिरियल तथा प्रहसनहरुमा आफ्नो कलाकारिता प्रस्तुत गर्ने क्रममा पछिल्लोपटक प्रचण्डको क्यारिकेचर गरेर चर्चामा आउनु भएका गौतमलाई बचाउन राज्य पक्षको समेत दायित्व रहेको कलाकारहरुले आवाज उठाइरहेका छन् ।
कलाकारितामै व्यस्त भइरहेको बेला २०८० असारबाट उहाँ विरामी पर्नुभयो । ठूलो आन्द्राको क्यान्सरबाट पीडित उहाँ अहिले क्यान्सरसँगै मिर्गौला र मानसिक समस्याबाट ग्रसित रहनु भएको छ । उहाँकी श्रीमती युगज्योतिले भक्तपुर क्यान्सर अस्पतालको लापरबाहीका कारण श्रीमानको यस्तो हालत भएको जिकिर गर्दै आउनु भएको छ ।
उहाँलाई डेढ वर्षअघि सक्कली प्रचण्डले समेत भेटेर प्रभावकारी उपचार गराउने प्रवन्ध मिलाउने भन्नुभएको थियो ।
