दमक, १६ जेठ / पहाडे काँचो कागजमा औषधिजन्य धुलोको मिश्रम बाटेर अर्गानिक धुप बनाउने कामले घर व्यवहारमा केही मद्धत पुग्ने बुझेर दमक ५ नम्बर वडाले आर्थिक व्यवस्थापन गरेको त्यसखाले तालिममा महिलाहरु चासोपूर्वक सहभागि भएका छन् ।
दिव्यदृष्टि भेनेरेसन एण्ड एग्रो कन्सर्न प्रालि कमलको प्राविधिक सहयोगको ५ दिने सो तालिम बुधबार सम्पन्न भएको छ । धुपी, भैरमपाती, कुमकुमपाती, कपुर, तितेपाती लगायतका औषधीय तथा अर्गानिक सुगन्धित धुपजन्य बस्तु मिसाएर गरिने धुप निर्माणको तालिममा २० जना महिलाहरु उत्सुकतापूर्वक सहभागि बनी तालिम उपलब्धिमूलक भएको प्रतिक्रिया दिएका छन् ।
तालिम समापनका अवसरमा बोल्दै ५ नम्बर वडाअध्यक्ष इन्द्रबहादुर गुरुङले यसअघि धेरैखाले सीपमुलक तालिम प्रदान गरिएपनि प्रशिक्षार्थीबाट खासै व्यवसायिक गतिविधि नभएको उल्लेख गर्दै धुपको तालिमबाट भनें उपलब्धि हुने अपेक्षा गर्नुभयो ।
यसप्रकारको अर्गानिक धुपको माग बढ्दै आएको अवस्थालाई दिव्यदृष्टि भेनेरेसनले अर्गानिक धुप उत्पादनको काम गर्दै आएको यसका प्रमुख विष्णुप्रसाद पोखरेलले जनाउनु भयो । देव कार्य र पितृ कार्यमा बालिने यसप्रकारको धुपलाई अब लामखुट्टे भगाउने धुपका रुपमा पनि विकास गर्ने तयारी चरणमा रहेको नविन योजना समेत उहाँले सुनाउनु भयो ।
विगत ५ वर्षदेखि यसखाले धुप बनाउने काम गर्दै आउनु भएकी ‘सहृदयता’ धुप उद्योगकी सञ्चालक खेमकुमारी संग्रौला ओली र दिव्यदृष्टि भेनेरेसन एण्ड एग्रो कन्सर्न प्रालिकी सञ्चालक वविता तिम्सिना पोखरेलले तालिमको सहजीकरण गर्नुभएको थियो । सो क्रममा प्रशिक्षक पोखरेलले आफूहरुले धुपको बजारीकरणमा सघाउने पनि जनाउनु भयो । तालिम समापनसँगै प्रशिक्षार्थीहरुलाई धुपको कच्चा पदार्थ समेत वितरण गरिएको थियो ।
