दमक, १७ जेठ / पत्रकारहरुले साहित्यमा पनि कलम चलाउँदे कृति प्रिकाशित गर्ने क्रम नेपालमा पनि बढेको छ । यसै सन्दर्भमा झापाका पत्रकार गोपाल झापालीको पहिलो कृति कथा संग्रह ‘हिजाब’का सन्दर्भमा दमकका सहकर्मीहरुसग संवाद भएको छ ।
केही समय अघि काठमाडौंमा लोकार्पित सो कृतिको शनिबार दमकस्थित पत्रकार मञ्चमा एक कार्यक्रमको आयोजना गरी संवाद गरिएको हो । संवाद सुरु गर्नुअघि लेखक झापालीले पुस्तकको लेखन पृृष्ठभूमिबारेमा सहकर्मीहरुलाई जानकारी गराउनु भएको थियो । २ दशक बढी समयदेखि पत्रकारितामा सक्रिय उहाँले आफू पत्रकारितामा आउनु अघिदेखि नै निवन्ध र कथाहरु लेख्ने गरेको सुनाउँदै आफूलाई मन पर्ने विधा भएकाले आख्यानको पुस्तक प्रकाशित गरेको जानकारी गराउनु भयो । मुस्लिम समुदायकी महिलाले सुन्दरता व्यवस्थापन गर्न लगाएको घुम्टोलाई ‘हिजाब’ विम्बका रुपमा प्रयोग गर्दै संग्रहको नामाकरण गरिएको झापालीले प्रष्ट्याउनु भयो ।
यसपछि झापालीका सहकर्मीहरुले ‘हिजाब’बारे र उहाँसगको सम्बन्धका बारेमा समेत स्मरण गरेका थिए । यसै क्रममा पत्रकार विमल लामिछानेले उहाँको कृतिको सफलताको शुभकामना दिदै झापालीको लेखनकला र पहिलो भेटको रोमाञ्चक स्मरण सुनाउनु भएको थियो ।
कार्यक्रममा पुस्तकबारेमा बोल्दै साहित्यकार तथा पत्रकार भूपेन्द्रराज तिम्सिनाले पत्रकारितामा साहित्यको शिल्प आवश्यक पर्ने भएकाले झापालीको त्यो शिल्प कथामा समेत पोखिनु प्रशंसनीय काम भएको प्रसंग अघि सार्नुभयो । उज्यालो खबरका सम्पादक समेत रहनु भएका तिम्सिनाले पुस्तक निकै वजनदार भएको र कथामा प्रस्तुत भएका विषयहरु समसामयिक र यूवा पुस्तालाई छुने खालको भएको भन्दै झापालीको प्रंशसा गर्नु भएको थियो ।
साहित्यकार धनकुटे कान्छाले पुस्तकको सज्जीसज्जावट र पुस्तकभित्रका खुराकको कलात्मकलाताले पुस्तक केन्द्रीयस्तरकै नेपाली साहित्यको पंक्तिमा रहेको जनाउनु भयो ।
सो अवसरमा पत्रकारहरु पंकज दाहाल, विष्णुप्रसाद पोखरेल, कमन देवान, मनकुमार गदाल, युवराज विवश, सुदिप अधिकारी, कानुन व्यवसायी लक्ष्मी निरौलासहितले झापालीको व्यक्तित्व र कृतित्वमाथि चर्चा गरे । भुँडीपुराण प्रकाशनद्धारा प्रकाशित संग्रहमा २१ वटा कथा समावेश भएका छन् ।
