करफोक, १९ जेठ /कोशी प्रदेश सरकारले घोषणा गरेको पर्यटन वर्ष २०८२ लाई सार्थक बनाउने उद्देश्यसाथ पत्रकारलाई लक्षित गर्दै इलामको करफोकमा तीन दिने विशेष तालिम सुरु गरिएको छ । तालिमले पत्रकारको कलम र क्यामेरामार्फत प्रदेशका पर्यटकीय सम्भावना उजागर गर्ने विश्वास गरिएको छ ।
सुर्योदय नगरपालिका–११ स्थित खलङगा सामुदायिक होमस्टे परिसरमा सुरु गरिएको तालिममा झापा, इलाम, पाँचथर र ताप्लेजुङका ३५ जना पत्रकार सहभागी भएका छन् । उनीहरूलाई पर्यटन पत्रकारिता, स्थानीय संस्कृतिको प्रस्तुति, समाचारको रोचक एंगल र पर्यटन प्रवद्र्धनमा मिडियाको भूमिका लगायत विषयमा तालिम दिइँदैछ ।
उद्घाटन सत्रमा बोल्दै खलङ्गा होमस्टे अध्यक्ष चन्द्र सापकोटाले स्थानीय महिलाको सक्रिय सहभागिता र स्थानीय उत्पादनमा आधारित सत्कार पद्धति खलङ्गाको विशेषता भएको उल्लेख गर्नुभयो । “यहाँको होमस्टे सेवा अरूभन्दा फरक छ, महिला नेतृत्वमा सत्कार चलाउने र स्थानीय स्वादमा पाहुना भिजाउने हाम्रो विशेषता हो,” सापकोटाले भन्नुभयो ।
प्रदेश सरकारको पर्यटन वर्ष घोषणासँगै मिडियाको भूमिकालाई संस्थागत बनाउने हेतुले पर्यटन पत्रकार मञ्च झापा गठन गरिएको र यस मञ्चकै समन्वयमा पहिलोपटक पर्यटन पत्रकारिता सम्बन्धी तालिम आयोजना गरिएको मञ्च अध्यक्ष कमल पाण्डेले जानकारी दिनुभयो ।
वरिष्ठ पत्रकार तथा नेपाल पत्रकार महासंघका संस्थापक महासचिव चन्द्र भण्डारीले भन्नुभयो, “नेपालले विदेशीलाई बेच्ने भनेको पर्यटन र संस्कृति हो, तर अझै यसलाई देखिने बनाएर प्रस्तुत गर्न सकेका छैनौं । यो तालिमले पत्रकारलाई त्यसतर्फ मार्गदर्शन गर्नेछ ।”
कार्यक्रमका प्रमुख अतिथि तथा इलाम क्षेत्र नं. १ का सांसद महेश बस्नेतले “पर्यटन बेच्न सकिएको छैन, सन्चारमाध्यमको सहयोगमा यसलाई बिकाउ बनाउन सकिन्छ,” भन्दै सञ्चारकर्मीको भूमिका निर्णायक रहेको जनाउनु भयो ।
यसैबीच, काँकडभिट्टा पर्यटन कार्यालयका अधिकृत निरज कट्टेलले भन्नुभयो “यो वर्ष कोशीका पर्यटन स्थलको खोज र प्रवद्र्धनको सुरुवातको वर्ष हो, यसबाट आर्थिक प्रगति पनि हासिल गर्न सकिन्छ ।’
तालिम बुधबारसम्म चल्नेछ र सहभागी पत्रकारहरूले आफ्ना क्षेत्रमा फर्किएर पर्यटन प्रवद्र्धनका प्रभावशाली सामग्री उत्पादन गर्ने अपेक्षा गरिएको छ । करफोकमा चलेको यो तालिम कोशीको पर्यटनमा नयाँ ऊर्जा भरिदिने विश्वास गरिएको छ।
