झापा, १९ जेठ | झापाको काँकडभिट्टामा रंगिन प्रिन्ट गरिएको खोटा नेपाली नोटसहित एक युवकलाई प्रहरीले नियन्त्रणमा लिएको छ।
जिल्ला तेह्रथुम ओयाक्जुङ गाउँपालिका–५ नेलईका २८ वर्षीय गणेश भारती गए राति करीब ९ बजे नेपाल बैंक अगाडि शंकास्पद रुपमा हिँडडुल गरिरहेको अवस्थामा पक्राउ परेका हुन्।
इलाका प्रहरी कार्यालय काँकडभिट्टाबाट खटिएको टोलीले उनलाई जाँच गर्ने क्रममा एक हजार दरको जस्तो देखिने खोटा नोट १०० थान फेला पारेको जनाएको छ। ती नोट रबरले बाँधिएको अवस्थामा थिए।
प्रहरीका अनुसार भारतीको साथबाट फेला परेका नोटमध्ये:
नोट नं. ञ.३१, ८६६५७९ उल्लेख भएको ४२ थान,
नोट नं. ज.१२, ०८३५७९ उल्लेख भएको ५६ थान,
नोट नं. झ.७६.२३८८२६ उल्लेख भएको २ थान
रहेको छ।
खोटा नोटसहित नियन्त्रणमा लिइएका भारतीमाथि मुलुकी फौजदारी संहिता, २०७४ अनुसार खोटा चलनसम्बन्धी कसुरमा अनुसन्धान सुरु गरिएको प्रहरीले जनाएको छ। यस सम्बन्धमा जिल्ला अदालतबाट पाँच दिनको म्याद लिई अनुसन्धान अघि बढाइएको छ।
प्रहरीले खोटा नोट उत्पादन तथा वितरणमा संलग्न अन्य व्यक्तिको खोजी समेत सुरु गरेको जनाएको छ।
