पथरी, १९ जेठ / सृजना क्षेत्रको गतिविधिमा सक्रिय उत्तरपूर्वी मोरङको पथरी शनिश्चरेमा सञ्चालित नगरस्तरीय सिङगिङ तथा डान्सिङ आइडल प्रतिष्पर्धाका उत्कृष्ठ १० मा छानिएकाहरुलाई सृजनशीलताको प्रवद्र्धन सम्बन्धि उत्प्रेरणामूलक तालिम सञ्चालन गरिएको छ ।
नगरपालिकाको उपसमितिका रुपमा रहेको कला साहित्य प्रवद्र्धन समितिको आयोजनाको आइडल प्रतिष्पर्धामा फाइनलमा पुगेकाहरुलाई पत्रकार एवम् सर्जक भूपेन्द्रराज तिम्सिनाले सृजनात्मक गतिविधिका बारेमा जानकारी गराउनु भयो । मनले बाँच्न र समाजलाई सृजनशील बनाएर अघि बढाउनु आजको आवश्यकता भएकाले सर्जकको भूमिका सोही अनुरुपको हुनुपर्ने विषय उहाँले गहन रुपमा अघि सार्नुभयो । कार्यक्रममा छनोटमा परेकाहरुलाई संस्थाका उपाध्यक्ष हरेन्द्र खत्री, सचिव लक्ष्मीप्रसाद फूयाँल, कोषाध्यक्ष अर्जुन सेञ्चुरीसहितले कार्यक्रमको लोगो अंकिट टिसर्ट वितरण गर्नुभयो । ३ दिने बन्द प्रशिक्षणको दोस्रो दिन नाट्यकर्मी जीवन बरालले अभिनय कला र प्रस्तुतिकरणका सन्दर्भमा सहजीकरण गर्नुभयो ।
मंगलबार (भोलि) इलाका प्रहरी कार्यालयमार्फत लागुऔषध दुर्व्यसन विरुद्धको सचेतनामूलक अभिमुखीकरण गरिने छ ।
पथरी शनिश्चरेको शिविरमा रहेका २ जना भुटानी शरणार्थी समेत गरी दुबै विधाबाट उत्कृष्ठ १०/१० मा परेकाहरुलाई जेठ २४ गते फाइनल प्रतिष्पर्धामा उतारिने छ ।
गायनतर्फ वडा नम्बर १ का रोश्नी गुरुङ, रिक्जन दर्नाल, उमेश विश्वकर्मा, किरण प्रताप विक, ओसियन सेञ्चुरी, आवन्तिका बस्नेत र अनम पराजुली छानिनु भएको छ । वडा नम्बर २ बाट राज लोहार, तुलसा थापा, वडा नम्बर ४ बाट अभिशेक मेयाङ्बो उत्कृष्ठ १० मा पर्नुभएको छ ।
नृत्यतर्फ, वडा नम्बर १ बाट आयुषा दर्जी, निमिषा बस्नेत, २ बाट सितल कार्की, कृष्टिना तामाङ छनोटमा पर्न सफल हुनुभयो । वडा नम्बर ४ बाट युनिका राई, ९ बाट अनुस्का सुनाम दर्जी, युन्छोमा लिम्बू र गरिमा मगर चुनिन सक्नु भयो । भुटानी शरणार्थी रहेको वडा नम्बर १० बाट शिविरका वितेस राई र सुजता घिसिङ छनोटमा परेर फाइनल चरणमा प्रवेश गर्नुभएको छ । वडा नम्बर १० मा जन्मेका भुटानी शरणार्थीलाई जन्मदर्ताका आधारमा प्रतिष्पर्धामा सहभागि गराइएको छ ।
पहिलो अडिसनबाट हसन्दह र पथरीमा गरी नृत्यमा ११४ जना र गायनमा १०२ जनाले भाग लिएका थिए । जसमध्ये नृत्यतर्फ ४८ र गायनतर्फ ५७ गरी १०५जना छनोटमा परेका थिए ।
फाइनलमा दुबै विधाका पहिलो, दोस्रो र तेस्रो हुनेलाई क्रमशः नगद ४० हजार, २० हजार र १० हजार तथा मेडल र प्रमाणपत्र प्रदान गरिने छ । गायनतर्फको कार्यक्रम अर्जुन सेञ्चुरी र नृत्यतर्फको रामबहादुर विश्वकर्माले संयोजन गर्नुभएको छ ।
कार्यक्रमको समापनका दिन नगरका चर्चामा रहेका लोकगायक गौरव दर्पणलाई नगद २५ हजार, मुहारचित्र र सम्मानपत्रले सम्मानित समेत गरिने कार्यक्रम रहेको छ । समग्र कार्यक्रमका लागि नगरपालिका कार्यालयको ६ लाख रुपैयाँ बजेट विनियोजन भएको छ । २०७५ मा नगरपालिकाको उपसमितिका रुपमा गठित समितिले साहित्य र कलाका गतिवधि वर्षेनी सञ्चालन गर्दै आएको समितिका अध्यक्ष धनराज राई अमीरले जनाउनु भयो ।
