दमक, २० जेठ / आफ्नो आत्मकथाको पुस्तक बिक्री गरेर नवीन आविष्कार गर्ने अभियानमा लाग्नु भएका नेपाली चर्चित वैज्ञानिक डा.महावीर पुनलाई मोरङको पथरी शनिश्चरेमा सम्मानित गरिएको छ ।
आफ्नो आत्मकथाको पुस्तक महावीर पुन बिक्री अभियानका क्रममा पथरी शनिश्चरे आइपुग्नु भएका आविष्कार केन्द्रका प्रमुख पुनलाई एभरेष्ट आर्ट फ्यूजन र पथरी सेरामिक उद्योगको तर्फबाट उहाँकै मुहारचित्रले सम्मानित गरिएको हो । एक संक्षिप्त कार्यक्रमकाबीच पथरी शनिश्चरे नगर प्रमुख मोहनप्रसाद तुम्बापो र फ्यूजनकी संस्थापक अध्यक्ष सरोजा खड्गीले सेरामिक उद्योगमा पुनलाई सम्मानित गर्नुभएको हो । सो क्रममा चित्रकार खड्गीले माटोका दैनिक उपभोग्य तथा सजावटका आकर्षक सामग्री निर्माण गर्दै आएको सेरामिक उद्योगलाई सामग्री उत्पादन गर्ने आधुनिक मेसिन आविष्कारको आवश्यकता दर्शाउनु भयो । यसक्रममा पुनले सेरामिक मल (साँचो) निर्माणमा धेरै लगानी पर्ने भएकाले नेपालमा त्यो स्तरको काम गर्न अप्ठेरो परिरहेको जनाउनु भयो ।
पुनले वडा नम्बर २ मा रहेको सेरामिक उद्योगको चासोपूर्ण रुपमा अवलोकन गर्दै मौलिक कलाको काममा लागेको टिमलाई धन्यवाद प्रदान गर्नुभयो । त्यसक्रममा खड्गीले निर्माण गर्नुभएको प्रतिगोटा ६० हजार भन्दा बढी मूल्य पर्ने २ वटा चित्रकला (पेन्टिङ) आविष्कार केन्द्रलाई सौजन्य प्रदान गर्नुभयो । ती पेन्टिङ बिक्री गरेर आविष्कारको काममा लगाउन सौजन्य प्रदान गरिएको हो ।
कृषकका लागि कृषि औजार निर्माण गरेर सहुलियतमा उपलब्ध गराउने कामका लागि पुनले केही दिनयता मोरङका विभिन्न ठाउँमा पुस्तक बिक्री अभियान सञ्चालन गर्नुभएको छ । युवा पुस्तामा पठन संस्कृतिको विकाससँगै देशलाई सही मार्गबाट कसरी अघि बढाउने भन्ने उत्प्रेरणा भर्दै देशको थप माया जगाउन पुस्तकले सन्देश दिने पुनको विश्वास छ । ०८० सालमा प्रकाशित सो पुस्तक हालसम्म १४ औं संस्करण गरी १ लाख ९५ हजार प्रति छापिइसकिएको छ ।
