पथरी, २२ जेठ / चित्रकलाको माध्यमबाट देश विदेशका कार्यक्रममा आफ्नो प्रभाव विस्तार गर्न सफल मोरङको पथरी शनिश्चरेकी चित्रकार सरोजा खड्गीका नारी संवेदनाका चित्रहरु बढी मात्रामा बिक्री हुने गरेका छन् ।
पछिल्लो पटक खड्गीले वैज्ञानिक डा. महावीर पुनले सञ्चालन गर्नुभएको राष्ट्रिय आविष्कार केन्द्रलाई प्रदान गर्नुभएको नारी संवेदनमा पोखिएका २ चित्रकला १ लाख २० हजार रुपैयाँमा बिक्री भएका छन् । पथरी शनिश्चरेमा आफ्नो आत्मकथाको पुस्तक बिक्री गरेर नयाँ आविष्कारमा लगानी गर्ने पुनको अभियानमा खड्गीले एभरेष्ट आर्ट फ्यूजन र पथरी सेरामिककोतर्फबाट २ वटा चित्रकला निःशुल्क प्रदान गरेर सहयोग पुर्याउनु भएको थियो । आविषकार केन्द्रले बिक्री गरेर रकम जम्मा गर्नका लागि प्रदान गर्नुभएको चित्र पुनले फेसबुक पेजमा पोष्ट गर्नासाथ बिक्री भएको हो ।
छत्रकोट ३, गुल्मी मुलघर भइ हाल अमेरिकाको र्यापिड सिटी साउथ डाकोडामा बसोबास गर्ने गोकर्ण टण्डनले आफ्नो जन्मदिनको अवसरमा प्रतिथान ६० हजार रुपैयाँमा ती चित्र खरिद गर्नुभएको पुनले जानकारी गराउनु भएको छ । सो रकम बीरगञ्ज कृषि औजार कारखानाको सञ्चालनमा खर्च गरिने पुनले उल्लेख गर्दै सरोजा र टण्डनलाई धन्यवाद ज्ञापन गर्नुभएको छ । पुनलाई सरोजाकै अगुवाईमा पथरी शनिश्चरेमा पुनकै मुहारचित्रले सम्मानित गरिएको थियो ।
नेपाल ललितकला प्रज्ञा प्रतिष्ठानकी प्राज्ञ सदस्य समेत बनिसक्नु भएकी खड्गी चित्रकलालाई आफ्नो जीवन मान्दै सोही क्षेत्रमा सक्रिय रहँदै आउनु भएको छ । एभरेष्ट आर्ट फ्यूजनको उहाँ संस्थापक अध्यक्ष हुनुहुन्छ ।
