दमक, २३ जेठ । हामीले दैनिक उपभोग गर्ने खानेकुरामा औषधीय गुण हुन्छ । बेसार, लसुन, मेथी, अजवाइन, गुर्जो, तुलसी — यी सबै रोग प्रतिरोधी तत्व हुन् । यिनको सही मात्रा, समय र तरिका बुझेर प्रयोग गर्यो भने घरकै भान्सा अस्पताल बन्न सक्छ ।
यसैलाई मध्यनजर गर्दै झापाको दमक नगरपालिका वडा नम्बर ६ मा भान्सालाई नै औषधालय बनाउने तालिम सञ्चालन गरेको छ । तालिमको औपचारिक उद्धाटन गर्दै वडाअध्यक्ष टेकबहादुर थापाले अहिले हरेक नेपालीको भान्सामा प्रयोग हुने खाना र बिभिन्न परिकार नै रोगको जड रहेको र यसको निराकरणमा दमक नगरपालिकाले अभियान नै सञ्चालन गरेको बताउनु भयो । भन्नुभयो ‘रसायनमुक्त बनौं, अर्गानिक खानेकुरा खाऔं र भान्सा नै औषधालय बनाऔं । यस अभियानलाई वडाले पनि यसलाई निरन्तरता दिएको छ ।’
२ दिने तालिममा नेपाली भान्सामा कस्ता परिकार बनाउने भन्ने विषयकासाथै योग र आर्युबेदका बिषयमा आवश्यक तालिम प्रदान गरिएको थियो । तालिमको सहजीकरण नेपाल आर्युबेदिक योग चिकित्सक डा. क्षितिज बाह्रकोटीले गर्नुभएको थियो । बाह्रकोटीले नेपाली खाना प्रयोगमा ल्याउँदा नेपाली भान्सा सही रुपमा भएपनि अहिले आधुनिकतामा रुपान्तरण गर्दा नेपाली भान्सामा समस्या आएको बताउनुभयो । करिब ४५ जना सहभागि रहेको तालिममा योग चिकित्सक र सहभागिहरुबीच अन्तरक्रिया भएको थियो ।
बाह्रकोटीकै सहभागितामा दमकस्थित पशुपति मन्दिर प्रांगणमा योग साधनाको समेत अभ्यास गरिएको थियो । जहाँ वडामा रहेका सैयौं नागरिक सहभागि भइ बिभिन्न आसनमा योग साधना गरेका थिए ।
दमक ८ की मेनुका दुलाल मानिसको जीबनमा योग जीवनको महत्व र आर्युबेदिक पद्धतीबारे महत्वपूर्ण जानकारी पाएकोमा खुसी ब्यक्त गर्नुभयो ।स्वस्थ खाना र स्वस्थ्य वातावरणमा बसे मात्र जीवन स्वस्थ र निरोगी बनाउन कार्यक्रमले सिकाएको दमक ५ की खेमकुमारी संग्रौला ओलीले प्रतिक्रिया जनाउनु भयो ।
नेपाली उखान नै छ, भान्सानै औषधिको घर हो भन्ने । यही कुरालाई ध्यान दिएर हरेक मानिसले आ–आफ्नो भान्सामा दैनिक प्रयोग हुने खाध्यवस्तुलाई चिनेर नियमित रुपमा खानामा प्रगोग गर्न सकेमा बजारमा प्याकिङको रुपमा तयारी भएका मिसावटयुक्त बस्तुलाई प्रयोगमा ल्याउन आवश्यक पर्दैन । जसले हामीलाई स्वस्थ रहन मद्धत पुग्छ ।
