भद्रपुर, २३ जेठ । एमाले निकट राष्ट्रिय युवा संघ नेपालले अवैज्ञानिक र अस्तव्यस्त शैलीमा योजना तर्जुमा नगर्न स्थानीय तहहरुलाई सचेत गराएको छ ।
स्थानीय तहहरुलाई ध्यानाकर्षणपत्र वुझाउँदै राष्ट्रिय युवा संघले स्थानीय सरकारहरुले वजेट तर्जुमा प्रक्रियामा विधिको शासन पालना नगरिरहेको आक्षेप लगाएको छ । यसले स्थानीय नेतृत्वको कार्यक्षमतामाथि नै प्रश्न खडा गरेको युवा संघले निचोड निकालेको छ ।
यस किसिमको अवैज्ञानिक, अव्यवस्थित र अस्तव्यस्त शैलीमा भएको योजना तर्जुमाले स्थानीय नागरिकहरुको समस्या, आवश्यकता र मागलाई सम्बोधन गर्नुको सट्टा केही व्यक्तिहरुको इच्छा र चाहना बमोजिम स्थानीय तहको वजेट केन्द्रित हुने संघको ठहर छ ।
यसै क्रममा राष्ट्रिय युवा संघ भद्रपुर नगर कमिटीले आज भद्रपुर नगरपालिका पुगी ध्यानाकर्षणपत्र बुझायो । कोशी प्रदेश कमिटी सदस्य बासु वन, अभिशेक प्रधान, जिल्ला कमिटी कोषाध्यक्ष संगिता खतिवडा, भद्रपुर नगर इन्चार्ज असिम शर्मा, जिल्ला कमिटी सदस्य रुपेन लिम्बू, भद्रपुर नगर कमिटी अध्यक्ष दिपक बुढाथोकी र सचिव पशुपति खतिवडासहितको टोली ध्यानाकर्षपत्र लिएर नगरपालिका पुगेको थियो । टोलीले नगरउप्रमुख राधा कार्कीलाई भेटी ध्यानाकर्षणपत्र वुझाएको थियो ।
पाँच वुँदे ध्यानाकर्षणपत्रमा स्थानीय तहको वजेट तर्जुमाका सात वटा चरणहरुको पूर्ण कार्यान्वयन गरिनुपर्ने, वार्षिक नीति तथा कार्यक्रम प्राथमिकताका सूचकहरु निर्धारण गर्नुपर्ने लगायतका माग समेटिएको छ । त्यस्तै टोल तथा वस्तीसम्मै योजना तर्जुमा गोष्ठी आयोजना गरिनुपर्ने, अन्तरसरकारी वित्त हस्तान्तरण ऐन र राष्ट्रिय योजना आयोगबाट जारी गरिएको दिग्दर्शन अक्षरशः कार्यान्वयन गरिनुपर्ने र युवा लक्षित आयोजना तथा कार्यक्रम तर्जुमाका लागि युवाका संघ, संगठन र युवाहरुको भेला आयोजना गरी कार्यक्रम छनोट गरिनुपर्ने संघको माग छ ।
