दमक, २५ जेठ | झापाको पूर्वपश्चिम राजमार्ग अन्तर्गत एसियन हाईवे परियोजनाको सडक स्तरोन्नति र डाइभर्सन कामहरु भइरहेको छ ।
सडक निर्माणका कारण ठाउँ ठाउँमा मुख्य बाटो बन्द गरि अस्थायी बैकल्पिक बाटो खोलिएको छ जसका कारण यात्राका क्रम ठप्प नभएपनि पानी परेको बेला हिलो त घाम लागेको बेला धुलोले गर्दा आवात जावतमा कठिन र जोखिमपूर्ण बन्दै गएको छ ।
डाइभर्सनले पूरै धुलैधुलो ल्याउने गरेको तर सडक विभागले पानी भने दिनमा दुई पटक मात्रै हाल्ने गरेको छ जसले गर्दा विभागले यो व्यवस्था गरेको हो कि बेवास्ता गरेको हो भन्ने कुरा नबुझेको स्थानीय दिपेन्द्र बुढाथोकी बताउनुहुन्छ ।
कमल गाउपालिका ३ केर्खाका भ्यान चालक काजीमान भटराई भने डिर्भजनका कारण गाडी कुदाईरहेको बेला ठूलो गाडीहरुले जथाभावी आफनो ट्र्याक छोडी सानो गाडीलाई पेल्न खोज्ने जसका कारण दुर्घटनाको जोखिम बढेको सुनाउनुहुन्छ ।
त्यस्तै, यात्रु नारायणप्रसाद ढकाल अहिले हाईवे बन्ने क्रममा बजार र बाटोको गतिविधि एकदमै नराम्रो रहेको तर नहिडी नभएको वाध्यता भएको बताउनुहुन्छ ।
यसरी यहाँको डिभर्जनले यात्रा गर्नुमात्र हैन यहाँ बस्ने मानिसहरुको दिनचर्यासम्म असरग्रस्त भएको छ । कति ठाउँमा धुलो, कति ठाउँमा हिलो छ जसले गर्दा यात्रा सुरक्षित छैन ।
