दमक, २७ जेठ / सडक निर्माणको सुनिश्चितता नभएसम्म दीपिनी मार्गको सडकको ढाट नखोल्ने स्थानीयको १० दिनदेखिको अडानपछि सम्बन्धित पक्षले कालोपत्रेको प्रक्रिया थाल्ने प्रतिवद्धता जाहेर गरेको पनि २० दिन भयो तर कालोपत्रेको प्रक्रिया अघि बढेन ।
स्थानीयको आन्दोलनपछि गत जेठ ७ गते कालोपत्रे चाँडै गर्ने भन्दै नगरपालिका कार्यालयमार्फत प्रतिवद्धता जनाएपनि प्रक्रिया अघि नबढेपछि मंगलबारबाट स्थानीयले पुनः दीपिनीमार्गमा ढाट लगाएर सडक बन्द गराएका छन् । ढल निकासको पाइप विछ्याउन भत्काएको सडक लामो समयसम्म त्यसै अलपत्र पारेर छोडिएको विषयमा दमक ५ स्थित दीपिनी मार्गका बासिन्दाले गत बैशाख २९ गतेबाट सडकमा ढाट लगाएर अवरोध गर्दै आएका थिए । नगरपालिका कार्यालयले मंगलबार दीपिनी मार्ग उपभोक्ता समितिलाई पत्र पठाई ठेकेदार पक्षबाट दु्रत गतिमा निर्माण कार्य थाल्ने प्रतिवद्धता जनाएको भन्दै सडकको अवरोध खोल्न अनुरोध गरेपछि जेठ ७ गते समितिले ढाट खोलेको थियो । दीपिनी मार्ग सडक उपभोक्ता समिति अध्यक्ष टेकेन्द्र बुढाथोकीले सर्त बमोजित सडकमा कालोपत्रे गर्ने कार्य नभएमा समितिले पुःन सडक अवरोध गर्ने जनाउने निर्णय गरिएको जनाउनु भएको थियो ।
संघीय खानेपानी तथा ढल व्यवस्थापन आयोजनाबाट ठेक्काको जिम्मा दिएको श्री जेएससी स्वामिनारायण आशिर्वाद जेभीले दु्रत गतिमा ह्यूम पाइप विछ्याएर कालोपत्रे गर्न प्रतिवद्धता जनाएको नगर प्रमुख रामकुमार थापाले उल्लेख गर्दै अवरोध खोलेर सहज वातावरण बनाउन समितिलाई पत्राचार गर्नुभएको थियो । सगरमाथा पेट्रोलपम्पदेखि उत्तर दीपिनीमार्ग हुँदै रातोपुलसम्मको सडक पुनःनिर्माण गर्ने क्रममा लाइफ लाइन अस्पताल अगाडिको भागमा गिट्टी हाल्न थालिएको थियो । तर गिट्टी हालेर यसो सम्याएजस्तो गरेर फेरि सडक अलपत्र छोडेपछि धुलोले सडक क्षेत्रका बासिन्दालाई बसिनसक्नु बनाएपछि सडक बन्द गर्न वाध्य भएको समिति अध्यक्ष बुढाथोकीले उल्लेख गर्नुभयो ।
३ महिना अघि सडक भत्काएर त्यसै अलपत्र छोडेपछि धुलो, हिलो र खाल्डा खुल्डीले स्थानीय हैरान भएपछि तत्काल सडक निर्माण कार्य थाल्न बैशाख ३० गते वडा कार्यालय र दमक नगरपालिका कार्यालयमा ३ वुँदे ज्ञापनपत्र बुझाएका थिए । यलम्बर चोक क्षेत्रमा स्थानीय आन्दोलित हुँदै सो क्षेत्रमा सुरुमा ढाट लगाएर सडक अवरोध कार्य थालेका थिए ।
ढलको पाइप विछ्याउन भत्काइएको सडक ०८१ चैत मसान्तभित्रमा कालोपत्रे गर्ने भनेर सम्झौता भएपनि ढलको पाइप मात्रै विछ्याएर सडक त्यसै अलपत्र पारेपछि समस्या भएका थियो । गत बैशाख २४ गते मन्त्रालयका प्रतिनिधि, आयोजना प्रमुख, नगर प्रमुख, ठेकेदार पक्षसहितको सहभागितामा सो सडक सम्बन्धि छलफल भएको र एक साताभित्र काम थाल्ने सहमति गरेको थियो ।
सो सडकखण्डको पूर्वी किनारमा ५ नम्बर वडा कार्यालय र पश्चिम किनारमा दीपिनी आधारभूत विद्यालय समेत पर्दछ । वडा कार्यालय अगाडि नै सडक खाल्डो परेर सिटी सफारी दुर्घटना समेत भएको अवस्था छ । धुलोले पसलका सामानहरु बिग्रिनु मात्र नभई मानिसहरु विरामी समेत पर्न थालेको स्थानीयको पीडा छ । सडक भत्काएर बीच बीचमा पाइप विछ्याइपनि लामो समय त्यसै अलपत्र छोडेपछि खाल्डा खुल्डी परेर पाइपमा माटो भरिएर काम नलाग्ने अवस्थामा पुगेको छ ।
