भद्रपुर, २९ जेठ । भद्रपुर नगर क्षेत्रका किसानले अव भाडाको राइस ट्रान्सप्लान्टर ( धान रोप्ने मेसिन) खोज्दै भौतारिनु पर्ने छैन ।
अघिल्ला वर्षहरुमा यहाँका केही किसानले मेचीनगरमा कार्यालय रहेको नेपाल वहुउद्देश्यीय सहकारी ( एनएमसी) बाट भाडामा राइस ट्रान्सप्लान्टर ल्याएर धान रोप्नुपथ्र्यो । यसरी भाडामा मेसिन खोज्दा उनीहरुले भनेको समयमा र सोचेजसरी धान रोप्न पाउँदैनथे ।
यो वर्षदेखि भने ती किसान ढुक्क छन् । भद्रपुर–१ मा रहेको पुष्पाञ्जली महिला कृषक सहकारीका सदस्य राजु भट्टराई भन्नुहुन्छ — ‘ अव हामी हाम्रो नगर क्षेत्रका किसानको धान अन्यत्रको भन्दा सस्तोमा रोपिदिन तयार छौंं ।’
यो वर्ष भद्रपुर नगरपालिकाले उपलव्ध गराएको दुइटा राइस ट्रान्सप्लान्टरमध्ये एउटा पुष्पाञ्जलीले पाएको छ । त्यस सहकारीका सदस्यहरुले केही वर्षयता कृषि उत्पादनलाई निकै बढावा दिएका छन् । गत वर्ष पनि त्यहाँका किसानले करिव २० विघा खेतमा एनएनसीबाट मेसिन भाडामा ल्याएरै भए पनि धान रोपेका थिए । यो वर्ष सय विघा हाराहारी खेतमा मेसिन लगाउने योजना रहेको भट्टराई बताउनुहून्छ ।
अर्को राइसट्रान्सप्लान्टर नेपाल वहुउद्देश्यीय सहकारीले नै पाएको छ । मेचीनगरमा आफ्नै ‘कस्टम हाइरिङ सेन्टर’ रहेको सो संस्थाले जिल्लाभरका किसानलाई यान्त्रिकरण सुविधा दिंदै आएको छ । यसका लागि कृषि ज्ञान केन्द्रमार्फत किसानले ५० प्रतिशत अनुदान पनि पाउँछन् । जस्तै ः एक विघामा मेसिनले धान रोप्दा लाग्ने १० हजार रुपैयाँमध्ये ५ हजार कृषि ज्ञान केन्द्रमार्फत् किसानले सिधै अनुदान पाउँछन् । ज्ञान केन्द्रले यो सुविधा झापाभरिका किसानलाई दिंदै आएको छ ।
‘हामी हाम्रा सदस्यमात्र होइन, सबै किसानलाई समान व्यवहार गर्छौं’–एनएमसीको कृषि फार्म उपसमितिका संयोजक हीरा पोखरेलको दाबी छ ।
कृषि यान्त्रिकरणका लागि भद्रपुर नगरपालिकाले चालु आर्थिक वर्षको वजेटमा ३० लाख रुपैयाँ छुट्याएको थियो । त्यसमा कोशी प्रदेश सरकारले ४० लाख थपिदियो । त्यति बजेटबाट दुइटा राइस ट्रान्सप्लान्टर र १६ हजार थान धानको व्याड राख्ने ट्रे खरिद गरिएको नगरप्रमुख गणेश पोखरेलले बताउनुभयो ।
नगरपालिकाको ७५ प्रतिशत अनुदान र कृषियन्त्र प्राप्त गर्ने संस्थाको २५ प्रतिशत लागत साझेदारीमा राइस ट्रान्सप्लान्टर वितरण गरिएको कृषि शाखा प्रमुख हेमराज पन्तले जानकारी दिनुभएको छ ।
