दमक, ३१ जेठ | देशको तराई क्षेत्र अहिले अत्याधिक गर्मीको चपेटामा परेको छ । व्यापार व्यवसाय ठप्प जस्तै छ । अन्य व्यवसायमा मन्दी देखिए पनि इलेक्ट्रोनिक्स पसलहरु भने चलायमान छन् ।
पछिल्लो केही दिनयता तापक्रम ३५ डिग्री सेल्सियसभन्दा माथि पुगेपछि जनजीवन असरग्रस्त बनेको छ । गर्मीका कारण बजार, शैक्षिक संस्था तथा सरकारी कार्यालयको नियमित कामकाजमा समेत असर परेको छ । दमक लगायतका स्थानमा दिउँसोको समयमा सडकहरु सुनसान देखिन्छन् भने सर्वसाधारणको चहलपहलमा समेत कमी आएको छ ।
गर्मीका कारण अधिकांश शैक्षिक संस्थाहरु बन्द गरिएका छन् । उता, अन्य व्यवसायमा मन्दी देखिए पनि इलेक्ट्रोनिक्स पसलहरु भने चलायमान छन् । गर्मी बढेकाले चार्जिङ गरेर चलाउन मिल्ने मिनी फेन र ठूला कुलरहरुको व्यापार निकै बढेको छ ।
विद्युत कटौतीको समस्या भएकाले रिचार्जेबल फेनको बिक्री उल्लेख्य मात्रामा भएको व्यवसायीको प्रतिक्रिय छ । दमक–६ स्थित अरुण इन्टरप्राइजेजका कर्मचारी राजु भण्डारी गर्मी बढेपछि फेन र कुलर किन्ने उपभोक्ताको भिड बढेको बताउनुहुन्छ ।
दमक–७ मा रहेको श्याम इलेक्ट्रोनिक्सका सञ्चालक श्याम सोनी पनि पछिल्लो दिनमा व्यापारमा उल्लेखनीय वृद्धि भएको बताउनुहुन्छ ।
मौसमविद्हरूका अनुसार तराई क्षेत्रमा यस्तो गर्मी अवस्था अझै १÷२ हप्ता रहने पूर्वानुमान गरिएको छ । यसले गर्दा व्यवसायीहरुले फेन, ए.सी र कुलरजस्ता सामग्रीको व्यापार अझै बढ्ने अपेक्षा राखेका छन्।
