गौरादह, ३१ जेठ / गौरादह नगरपालिका १ स्थित सभाहलमा १५ दिने ‘बाटेको अर्ग्यानिक एण्टी ब्याक्टेरियल धुप र परालको चप्पल उत्पादन, बजारीकरण तथा ब्राण्डिङ’ सम्बन्धी तालिम सम्पन्न भएको छ ।
नगरपालिकाको आर्थिक सहयोगमा दिब्यदृष्टि भेनेरेसन एण्ड एग्रो कन्सर्न कमलले सञ्चालन गरेको तालिमले महिला तथा स्थानीय समुदायमा आत्मनिर्भरता र साना उद्योमी बन्न चाहानेप्रति उत्साह बढाएको छ ।
कार्यक्रमकी प्रमुख अतिथि गौरादह नगरपालिकाका उपप्रमुख जलवर्षा राजवंसीले नगरले उत्पादनमुखी तालिमहरूलाई प्राथमिकतामा राखेको र यस्ता प्रयासहरूले रोजगारी सिर्जना र स्वदेशमै आत्मनिर्भरता सम्भव हुने बताउनु भयो । उहाँले यस प्रकारका कार्यक्रम धेरै भए पनि यो कार्यक्रम प्रभावकारी देखिने विश्वास व्यक्त गर्नु भयो ।
कार्यक्रममा दिब्यदृष्टि भेनेरेसन तथा पाभीभरा हेल्थ एन्ड वेलनेश फाउण्डेसनका अध्यक्ष विष्णुप्रसाद पोखरेलले तालिमको उद्देश्य, महत्व र सहभागीहरूद्वारा बनाइएका सामग्रीबारे विस्तृत जानकारी दिनुभयो । सहभागीहरूलाई उत्पादनपछि बजारीकरणमा सहजीकरण गरिने पनि जानकारी दिनुभयो । स्वास्थ्य जीवनका लागि अर्ग्यानिक तथा एण्टी ब्याक्टोरियल धुप उत्पादनमा आफुहरु लागेको र दिब्यदृष्टि ब्राण्डको धुप बजारमा ल्याएको पोखरेलले प्रष्ट्याउनु भयो ।
कार्यक्रमको समापनमा गौरादह नगरपालिकाकी महिला तथा बालबालिका शाखा प्रमुख वविता तुम्बापो र वडा सदस्य अञ्जु निरौलाले सहभागीहरूलाई आगामी दिनमा निरन्तर उत्पादन गरेर व्यवसायिक यात्रामा लाग्न प्रेरणा दिदै आगामी दिनमा सो कार्यक्रमलाई निरन्तरता दिने जनाउनु भएको थियो ।
प्रमुख प्रशिक्षक समेत रहेकी दिब्यदृष्टिकी सञ्चालक एवम् कार्यकारी प्रमुख वविता तिम्सिनाले तालिमले महिलाहरुको उद्यमशीलताको जग बसाउन ठूलो टेवा पुर्याउने वताउनु भयो । तालिममा सहभागीले चाख मानेर सीप सिकेका थिए ।
तालिममा सहभागीहरूलाई बीउ पुँजीस्वरूप आवश्यक धुप बनाउन चाहिने सामग्री र ब्राण्डिङ सामग्री प्रदान गरिएको छ ।
१५ दिनको अवधिमा स्थानीय स्रोत साधनको सदुपयोग गरी नयाँ उत्पादनको सम्भावना उजागर हुनुका साथै बजारसम्म पु–याउने सीप सिकाइएको आयोजकको भनाइ छ ।
