दमक, जेठ ३१ — दमक नगरपालिकाले पूर्व र पश्चिम तर्फ बहने कमस खोला र मावा खोलाबाट नदीजन्य सामग्री (बालुवा, गिट्टी, ढुंगा आदि) को उत्खनन, संकलन र ढुवानी कार्य आजदेखि अर्को व्यवस्था नभएसम्मका लागि रोक लगाएको छ।
नगरपालिकाले आज (२०८२ साल जेठ ३१ गते) साझ ६:०० बजेदेखि यो निर्णय कार्यान्वयनमा ल्याएको हो।
दमक नगर कार्यपालिकाको कार्यालयद्वारा जारी सूचनामा भनिएको छ, “सामान्य निर्माणका लागि आवश्यक नदीजन्य सामग्री उत्खनन तथा संकलन कार्य अन्य व्यवस्था नभएसम्म पूर्णतः बन्द गरिएको छ।”
सूचनामा नगर क्षेत्रभित्र नदीजन्य स्रोतहरूको अनियन्त्रित दोहन रोक्न तथा कानुनी व्यवस्थालाई कार्यान्वयनमा ल्याउन यो निर्णय गरिएको उल्लेख गरिएको छ। साथै, सूचनाको अवज्ञा गरी नदीजन्य सामग्री उत्खनन वा संकलन तथा ढुवानी गरे कानुनी कारबाही हुने नगरपालिकाले स्पष्ट पारेको छ।
नगरका प्रमुख प्रशासकीय अधिकृत गणेशराज कार्कीद्वारा हस्ताक्षरित सूचनामा नगरवासी, निर्माण व्यवसायी तथा सम्बन्धित पक्षलाई सावधानीपूर्वक यस्ता गतिविधि नगर्न आग्रह गरिएको छ।
