दमक, २ असार / दमक ५ स्थित दीपिनी मार्ग भत्काएर अस्तव्यस्त बनेको २ महिनापछि सडक कालोपत्रे कार्य अघि बढेको छ ।
घर घरबाट नालामा ढल जडान गर्न २ महिना अघिबाट सडक भत्काएर पाइप विछ्याएपनि पुन कालोपत्रे नगरिँदा स्थानीय धुलोले हैरान बन्दै आएको अवस्था थियो । पानी पर्दा हिलोले उस्तै समस्या । स्थानीयले लगातार आन्दोलन अघि बढाएर सडकमा ढाट लगाएपछि निर्माण पक्षले काम थालेको हो ।
संघीय खानेपानी तथा ढल व्यवस्थापन आयोजनाबाट ठेक्काको जिम्मा दिएको श्री जेएससी स्वामिनारायण आशिर्वाद जेभीले भृकुटी चोकतर्फबाट कालोपत्रे गर्न थालेपछि स्थानीयले राहतको महसुस गर्न थालेका छन् ।
सडक कालोपत्रेको प्रक्रिया थाल्ने भन्दै सडकको धुलो उडाउने क्रममा उडेको माटो फुटपाथमा थुपारिदिएपछि त्यसलाई उठाएर स्थानीयवासीले सफा गरेका थिए श्री जेएससी स्वामिनारायण आशिर्वाद जेभीले दु्रत गतिमा ह्यूम पाइप विछ्याएर कालोपत्रे गर्न प्रतिवद्धता जनाएको भएपनि २० दिनसम्ममा पनि प्रक्रिया सुरु नगरेपछि जेठ २७ बाट स्थानीयले पुनः सडकमा ढाट लगाएका थिए ।
