दमक, ६ असार / झापाको दमकका छविराम न्यौपानेसहितको परिवारले खडा गरेको अक्षयकोषले वर्षेनी शिक्षक सम्मान र विद्यार्थी छात्रवृत्ति कार्यक्रम समाजसेवाको उदाहरण बन्दै आएको छ ।
न्यौपाने परिवारले खडा गरेको १० लाखको अक्षयकोषमार्फत शुक्रबार साहित्य कला संगमको आयोजनामा तुलसादेवी न्यौपाने स्मृति पुरस्कार २०८१ बाट हिमालय माविकी शिक्षक नैनकला थेवे सम्मानित बन्नु भयो । कार्यक्रमका प्रमुख अतिथि कमल वस्ती, कोषदाता छविराम न्यौपाने, डा. लेखनाथ न्यौपानेसहितबाट उहाँलाई नगद ५ हजारसहितले सम्मानित गरियो ।
यसैगरी, हिमालय माविका १० र पृथ्वी माविका १० गरी २० जना जेहेन्दार विद्यार्थीलाई जनही ३ हजारका दरले छात्रवृत्ति तथा सूर्यदर्शन सहकारीबाट विद्यालय झोला प्रदान गरिएको छ ।
यसकासाथै हिमालय मावि पूर्व विद्यार्थी मञ्च २०४४ समूहका अध्यक्ष डा. लेखनाथ न्यौपानेको अगुवाईमा १ लाख रुपैयाँ अक्षयकोष खडा गरिएको छ । सो कोषबाट पहिलो पटक हिमालय माविका सुज्जा काफ्ले र नेहा लिम्बूलाई जनही ३ हजारका दरले सुनौलो भविष्य पुरस्कार समेत वितरण गरिएको छ ।
साहित्य कला संगमका अध्यक्ष विष्णु न्यौपानेको अध्यक्षताको कार्यक्रममा साहित्यकारहरु यादवप्रसाद अधिकारी झाँक्रीखोले, मेघनाथ बन्धु, भूपेन्द्रराज तिम्सिना, कृष्ण उदासी, दुर्गा खनाल काफ्लेसहितले रचना वाचन गर्नुभयो ।
