इलाम, ९ असार / गाउँपालिकाले अनुदानका कार्यक्रम संचालन गरेपछि इलामको सन्दकपुरमा व्यवसायिक कृषि र पशुपालनमा किसानको आकर्षण बढेको छ ।
उन्नत बीऊ, प्रविधि र सीप हस्तान्तरणसँगै अनुदान रकम समेत दिन थालेपछि व्यवसायिक कृषि र पशुपालनमा सन्दकपुरवासी लागेका छन् ।
सन्दकपुर ३ का मदन निरौला व्यवसायिक रुपमा कृषि र पशुपालन गर्नुहुन्छ । मुना मदन कृषि र पशुपालन फार्म दर्ता गरि निरौला कृषि उपज र दूध बिक्रीबाट आम्दानी गर्दै आउनुभएको हो । निरौलाका गोठमा ३० लिटर दूध दिने उन्नत जातको गाई छ । गाईपालनसँगै निरौलाले अलैँची, अदुवा, चिया खेतीसँगै बाख्रा पालन गर्दै आउनुभएको छ ।
उहाँमात्र होईन, सन्दकपुर ३ कै प्रकाश पराजुली व्यवसायिक रुपमा तरकारी खेती गर्नुहुन्छ । मौसमी र बेमौसमी खेती गर्दै आउनुभएका पराजुलीले आफ्नो घर खर्चको माध्यम तरकारीको आम्दानी भएको छ । मदन निरौला र प्रकाश पराजुली मात्रै हैन गाउँ घरमा स्थानीय सरकार पुगेपछि इलामको सन्दकपुरमा कृषि, तरकारी र पशुपालनमा किसानको आकर्षण भएको छ । सन्दकपुर गाउँपालिकाले परम्परागत हिसाबले कृषि र पशुपालन गर्दै आएका किसानलाई व्यवसायिक बनाउन अनुदानका कार्यक्रम संचालन गर्दै आएको हो । प्रदेश र संघीय सरकारसँगको समन्वयमा संचालन भएका अनुदानका कार्यक्रमले सहयोग पुगेको कृषक प्रकाश पराजुलीले बताउनुभयो ।
सन्दकपुरमा अलैची, अम्रिसो, किबी, जडिबुटी, तरकारी खेती र पशुपालनका व्यवसायिक फार्म दर्ता हुने क्रम बढेको छ । यसक्रममा वडा नम्बर ३ को माइपताल क्षेत्रलाई औद्योगिक ग्राम बनाउने योजना सन्दकपुरको छ । सन्दकपुरमा उद्योग व्यवसाय दर्ताको संख्या ५ सय २८ छ । कृषि र पशुपालन सम्बन्धि फार्महरु दर्ता भइ संचालन भएपनि माग अनुसारको सहयोग नपाएको किसान मदन निरौलाले बताउनुभयो । कृषि, पशुपालन र पर्यटन व्यवसाय यहाँको मुख्य आम्दानी हो ।
