पथरी, १२ असार / उत्तरपूर्वी मोरङको पथरी नगर अस्पतालले पछिल्लो १ वर्षमा १ लाख २ हजार १ सय ८७ जनाको स्वास्थ्य उपचार गरेको छ ।
पथरी शनिश्चरे नगरपालिकाद्वारा सञ्चालित नगर अस्पतालको छैटौं स्थापना दिवसको अवसरमा प्रस्तुत प्रतिवेदनमा सो तथ्यांक उल्लेख गरिएको छ । स्वास्थ्य बीमा कार्यक्रममार्फत समेत उपचामा संलग्न अस्पतालले सो अवधिमा ११ करोड ७९ हजार २ सय ४९ रुपैयाँको आम्दानी र १० करोड ४ लाख ४१ हजार ५ सय ६५रुपैयाँ खर्च भई १ करोड ७४ लाख ८३ हजार ३ सय ३६ रुपैयाँ बचत रहेको नगरका स्वास्थ्य शाखा प्रमुख मुरारी आचार्यले जानकारी दिनुभयो ।
वडा नं. २ को छ्यालिस बिघेमा अवस्थित नगर अस्पतालको स्थापना दिवसको अवसरमा असहाय मानव सेवा समाज दमकको प्राविधिक सहयोगमा निःशुल्क दन्त शिविर सञ्चालन समेत गरिएको छ ।
नगर प्रमुख मोहन प्रसाद तुम्वापोको अध्यक्षतामा भएको सो कार्यक्रममा २ नम्बर वडाध्यक्ष एवम् अस्पताल व्यवस्थापन समितिका सदस्य नैना राईले स्वागत मन्तव्य राख्नुभएको थियो ।
पञ्चायत माविको वि.व्य.स. अध्यक्ष युवराज बास्कोटा, नेपाली कांग्रेसका नगर उपाध्यक्ष के.बी. गुरुङ, पूर्व नगर प्रमुख दिलिपकुमार राई (किशोर), संविधानसभा सदस्य चण्डीप्रसाद राईले शुभकामना मन्तव्य व्यक्त गर्नुभयो ।
वार्षिकोत्सवको अवसरमा अस्पतालका उत्कृष्ट कर्मचारी डा. ओम शान्ति रजक र एल्डिना गुरुङलाई सम्मान गरिएको थियो । ६४ जना कर्मचारी कार्यरत रहेको अस्पतालमा दैनिक ३ सयको हाराहारीमा बिरामी उपचार गर्न आउने गरेका छन् ।
स्वास्थ्य क्षेत्रको व्यवस्थापनमा नगरको प्रभावकारिता झल्किएको देखिन्छ । अस्पतालको सुविधा सम्पन्न आधुनिक भवन निर्माण कार्य अन्तिम चरणमा पुगेको छ ।
