दमक, १२ असार । झापा जिल्लामा सडक निर्माण र कालोपत्रे कार्य अन्तिम चरणमा पुगेका छ । सडक डिभिजन कार्यालय दमकका अनुसार चालू आर्थिक वर्षमा जिल्लामा ९३ किलोमिटर सडक कालोपत्र गर्ने लक्ष्यसहित कार्य भइरहेको छ।
भौतिक पूर्वाधार तथा यातायात मन्त्रालय अन्तर्गत सञ्चालनमा रहेका विगतका केही आयोजना र चालू वर्षका योजनासहित झापामा हाल ९१ वटा परियोजनाहरू ठेक्कामार्फत कार्यान्वयनमा छन्। सडक डिभिजन कार्यालय दमकका सूचना अधिकारी ई. बिपिन ढुङ्गानाका अनुसार चालू आर्थिक वर्षमा निर्वाचन क्षेत्र रणनीतिक योजना तथा विगतका योजनाहरूका सडकमा कालोपत्रे भइरहेको छ। ती सबै योजना असार मसान्तसम्ममा सम्पन्न गर्ने लक्ष्य रहेको छ।
सडक डिभिजन कार्यालयका अनुसार दमक–चिसापानी सडक अन्तर्गत चपेटी–मार्चेबुङ खण्डको ६ किलोमिटर सडक पनि यसै वर्ष सम्पन्न गर्ने लक्ष्य रहेको छ। यद्यपि कुल प्रगतिबारे यथेष्ट तथ्यांक सार्वजनिक नगरिए पनि कार्य सन्तोषजनक रूपमा अघि बढिरहेको ढुंगानाले बताउनुभयो ।
