दमक, १५ असार / सरकारले सुनमा २ प्रतिशत कर र हिरा जवाहरात बहुमूल्य वस्तुमा १३ प्रतिशत भ्याट लगाउने तयारी गरेसँगै पुनः सुनचाँदी व्यवसायीहर आन्दोलित भएका छन् ।
यसअघि देशैभरका सुनचाँदी व्यवसायीहरु सरकारको निर्णयको विरोध गर्दै विभिन्न नारा सहित आन्दोलनमा उत्रिएका थिए । पछि सरकारसँग सहमति गर्दै आन्दोलन स्थगित भएको थियो । तर फेरि बजेट पास हुने बेला माग सम्बोधन नभएपछि उनीहरू अनिश्चितकालिन व्यवसाय बन्द गरी वृहत् र्याली गरिरहेका छन् । सधैँ भिडभाड रहने झापा दमकको सुनचाँदी पसलहरु पनि सुनसान छन् । सबै सुनचाँदी पसलहरुको अगाडि ठूलाठूला ताला लगाइएका छन् ।
झापाको दमक ६ पशुपती मार्गमा आइतबार दमकका सुनचाँदी व्यवसायीहरु पसल बन्द गरी आन्दोलनमा उत्रिएका थिए । देशैभरका सुनचाँदी व्यवसायसीहरुको उही गुनासो र उही माग । सरकारले सुनमा २ प्रतिशत कर र हिरा जवाहरात बहुमुल्य वस्तुमा १३ प्रतिशत भ्याट लगायो । यसबाट व्यवसायीमात्र होइन, उपभोक्ताहरु पनि मार्कामा पर्ने भन्दै व्यवसायीहरुले आफूहरुसँग उपभोक्ताहरुलाई पनि सामेल गरेर आन्दोलन गरेका थिए ।
दमक सुनचाँदी व्यवसायी महासंघका उपाध्यक्ष साथै कार्यवाहक अध्यक्ष पुष्पलाल शंकर आफूहरु बारम्बार आन्दोलनमा उत्रिदा पनि सरकारद्धारा सुनवाई नभएको भन्दै गुनासो व्यक्त गर्नुहुन्छ ।
आन्दोलनमा साथ दिन आउनुभएका दमक उद्योग वाणिज्य संघका वरिष्ठ उपाध्यक्ष राजु खड्का सम्पूर्ण प्रक्रिया पूरागरी व्यवसाय गरिरहेका व्यवसायीहरुमा राज्यले विलासिताको कर लगाइदिएको बताउँदै उहाँ भन्नु हुन्छ ‘राज्यले चाँडो भन्दा चाँडो यो निर्णयलाई फिर्ता लिएर व्यवसायीलाई व्यवसायमै फर्काउने वातावरण बनाओस् ।’
आन्दोलन बाहिरबाट हेर्दा सुनचाँदी व्यवसायीहरुको लागि जस्तो देखिएपनि भित्री त्यस्तो नरहेको र त्यो विशेष उपभोक्ताहरुको लागि रहेको व्यवसायीको दाबी छ । सरकारले व्यापारीलाई माध्यम बनाएर उपभोक्ताबाट बिलासिता कर उठाउन खोजेको भन्दै यो अन्दोलनमा उपभोक्ताहरु पनि उत्तिकै सामेल हुन आग्रह गर्नुहुन्छ दमक सुनचाँदी महासंघका कानुनी सल्लाहकार युवराज निरौला ।
करोडौं लगानी गरेर व्यवसाय गरिरहेका सुनचाँदी व्यवसायी र उपभोक्तामाथी राज्यले मनलाग्दी बृद्धि गरेको करका बारेमा सर्वत्र विरोध भइरहेको छ । यसले व्यापारीको व्यापार गर्ने हकको हनन् त भएको छ नै उपभोक्तामाथि आर्थिक बोझ बढाउने काम राज्यतहबाट हुनु उचित नभएको उपभोक्तावादी सस्थाहरुको भनाइ छ ।
