दमक, १९ असार / नेपाल सरकार, संस्कृति, पर्यटन तथा नागरिक उड्डयान मन्त्रालयले मोरङको पथरी शनिश्चरे क्षेत्रबाट उदाएर विगत ३० वर्षदेखि नेपाली साहित्य तथा पत्रकारिता क्षेत्रमा सक्रिय विमला तुम्खेवालाई कोशी ‘प्रादेशिक प्रतिभा पुरस्कार २०८१’ ले पुरस्कृत गर्ने भएको छ ।
सञ्चारिका समूह नेपालको निवर्तमान केन्द्रीय अध्यक्ष, वर्तमान सल्लाहकार, नेपाली लेखक संघको केन्द्रीय उपाध्यक्षलगायतका संघसंस्थाहरूमा नेतृत्वदायी भूमिकामा रहनु भएकी तुम्खेवालाई नगद ५० हजारसहितको पुरस्कार प्रदान गरिने भएको हो ।
मन्त्रालयले साहित्य विधामा एक जनालाई राष्ट्रिय प्रतिभा पुरस्कार र प्रत्येक प्रदेशबाट एक एक जनालाई प्रादेशिक पुरस्कार प्रदान गर्ने निर्णय गरेको मन्त्रालयका सहसचिव रामकृष्ण लामिछानेद्वारा हस्ताक्षरित प्रेस विज्ञप्तिमा जनाइएको छ ।
तुम्खेवा ०५० को दशकको सुरुवातबाट पथरीबाट संघर्षपूर्ण रुपमा साहित्य र पत्रकारिता सुरु गर्दै आफूलाई राष्ट्रियस्तरको प्रतिभाका रुपमा स्थापित गर्दै राष्ट्रियस्तरका विभिन्न पुरस्कार र सम्मान प्राप्त गरिसक्नु भएको छ । उहाँ साहित्यनै सबैथोक ठानेर लगातार त्यसैमा समर्पित बन्दै आउनु भएको सर्जकमा गनिनुहुन्छ । हाल काठमाडौंमा रहनु भएकी उहाँको प्रमुख साहित्यिक विधा कविता हो ।
रामेछापका अमृत योञ्जन तामाङलाई राष्ट्रिय प्रतिभा पुरस्कार प्रदान गरिने समेत उल्लेख छ ।
