मेचीनगर, २३ असार | भारतको पानीट्याङ्कीबाट नेपाल प्रवेश गर्ने क्रममा लागुऔषधसहित एक युवकलाई प्रहरीले नियन्त्रणमा लिएको छ।
पक्राउ परेका व्यक्ति पाँचथर मिक्लाजुङ गाउँपालिका–१ घर भई हाल झापा शिवसताक्षी नगरपालिका–८ मा बसोबास गर्दै आएका २५ वर्षीय जितेन्द्र आङ्देम्बे हुन्।
लागुऔषध नियन्त्रण ब्यूरो, काँकडभिट्टाबाट खटिएको प्रहरी टोलीले झापा मेचीनगर–६ स्थित पुरानो मेचीपुल नजिकैबाट आङ्देम्बेलाई सोमबार साँझ करीब ५ बजे नियन्त्रणमा लिएको हो।
उनी सिटिसफारी सवार भएर भारतको पानीट्याङ्कीबाट नेपाल प्रवेश गर्दै गर्दा शंका लागि शरीर तलासी गर्दा मलद्वारभित्र लुकाइएको अवस्थामा निलो रङको प्लास्टिक पोका फेला परेको प्रहरीको भनाइ छ।
उक्त पोका खोली हेर्दा त्यसमा लिसिलो पदार्थ जस्तो देखिने खैरो हेरोइन रहेको पाइएपछि पोका सहित नापतौल गरिएको थियो। प्रहरीका अनुसार प्लास्टिकसहितको तौल २ ग्राम ६३० मिलिग्राम तथा प्लास्टिक बाहेक २ ग्राम ८ मिलिग्राम लागुऔषध (खैरो हेरोइन) रहेको पुष्टि भएको छ।
पक्राउ परेका आङ्देम्बेलाई लागुऔषध कसुर अन्तर्गत कारबाही प्रक्रिया अघि बढाइएको तथा विस्तृत अनुसन्धान जारी रहेको प्रहरीले जनाएको छ।
