दमक, १० साउन । कोशी प्रदेश सरकार झापाको कमल गाउँपालिका–७, लखनपुरस्थित प्रादेशिक आयुर्वेद अस्पताललाई अझ सशक्त बनाउने दिशामा अगाडि बढेको छ। कोशी प्रदेशका मुख्यमन्त्री हिकमत कुमार कार्कीले उक्त अस्पतालमा नेपाल सरकारको स्वास्थ्य बीमा कार्यक्रम लागू गर्न आफैंले पहल गर्ने घोषणा गर्नुभएको छ।
शुक्रबार अस्पताल प्राङ्गणमा आयोजित स्वर्ण बिन्दु प्राशन कार्यक्रममा प्रमुख अतिथिका रूपमा बोल्दै मुख्यमन्त्री कार्कीले अस्पताललाई कम्तीमा रेफरल आयुर्वेद अस्पतालको रूपमा विकास गर्ने लक्ष्य रहेको बताउनुभयो। उहाँले भन्नुभयो, “अस्पतालमा आवश्यक जनशक्ति, उपकरण र पूर्वाधार विस्तार गर्न प्रदेश सरकार तयार छ। सेवालाई गुणस्तरीय बनाउने कुरामा कुनै कसुर बाँकी राखिने छैन।”
सो अवसरमा बालबालिकाको रोग प्रतिरोधात्मक क्षमता अभिवृद्धि गर्ने उद्देश्यले सञ्चालनमा ल्याइएको स्वर्ण बिन्दु प्राशन कार्यक्रमलाई सरकारले वार्षिक कार्यक्रममै समावेश गरेर निरन्तरता दिने पनि प्रतिवद्धता मुख्यमन्त्रीले व्यक्त गर्नुभयो।
प्रादेशिक आयुर्वेद अस्पतालका मेडिकल सुपरिटेन्डेन्ट डा. सिद्धार्थ ठाकुरका अनुसार, ६ महिनादेखि ७ वर्षसम्मका बालबालिकालाई लक्षित गरी प्रत्येक महिनाको पुष्य नक्षत्रमा स्वर्ण बिन्दु प्राशन गराइन्छ। स्वर्ण भष्मलाई विभिन्न आयुर्वेदिक औषधिमा मिसाई, घिउ र महको साथ बालबालिकालाई दिइने यो प्रक्रिया निःशुल्क रूपमा प्रदान गरिँदै आएको छ।
डा. ठाकुरका अनुसार, स्वर्ण बिन्दु प्राशनले बालबालिकाको शारीरिक, मानसिक, पाचन क्षमता र रोग प्रतिरोधात्मक क्षमता बढाउने वैज्ञानिक विश्वास छ। अस्पतालमै उत्पादन भएको स्वर्ण बिन्दुले देशकै उदाहरणीय कार्यक्रमको रूप लिएको बताइएको छ।
कोशी प्रदेश सरकारले आयुर्वेदलाई समग्र स्वास्थ्य सेवाको अभिन्न अङ्ग बनाउँदै लैजाने संकेत यस्तै कार्यक्रमबाट देखिएको छ।
