दमक १८ साउन । दमक ३ दापगाछीमा १८ तला अग्लो सेतो टावर ठडिएको छ । यो टावरको भित्र छिर्न र टावरमा चढ्न अहिले एक सय रुपैँया तिरेर टिकट काटनुपर्छ । अनि यहाँबाट भित्र र बाहिरका सबै दृष्य अवलोकन गर्न सकिन्छ ।
खासमा अहिले यो टावरको भित्र भन्दा पनि बरु बाहिरै केही रमाइलो हुन सक्छ । टावर भित्र प्रवेश गर्दा सबै ठाउँ खाली देखिन्छ । खाली ठाउँ देखिदा सबैको मन ओहो यस्तो ठाउँमा यो खालको व्यापार खोल्ने हो भने त चल्छ होला भन्ने परिकल्पना आउन सक्छ । सुनसरीको इटहरीबाट यही टावरमा चढ्न भनेर झण्डै डेढ घण्टाको यात्रा गरेर परिवारसहित आउनु भएका भक्तबहादुर खड्कालाई यहाँ आउँदा निकै आनन्द लाग्यो । उहाँले सुझाव दिनु भएको छ – बनावट जस्तो कल्पना गरिएको थियो त्यस्तै रहेछ । माथीबाट पनि आकर्षक दृष्यहरु हेरेर आनन्द महसुस भयो । तर भित्रका सबै कोठाहरु खाली देखिदा चाहि उती मन परेन । त्यहाँ होटल तथा रेष्टुरेण्ट मात्रै भएपनि सुचारु गरिहाल्नु पर्यो ।
यस्तै विर्तामोडबाट यही टावर अवलोकन गर्न आउनु भएका सागर तिवारीलाई यहाँ भित्र र बाहिर घुम्दा रमाइलो लाग्यो । तर यो टावरलाई सबै उपभोक्ता तथा सर्वसाधारणको पहँचयोग्य बनाउन सबैखाले पसलहरुको ठूला सोरुम तथा होलसेलमा सामान पाउने प्रमुख गन्तव्य बनाउन आवश्यक रहेको उहाँको सुझाव छ ।
खाद्यान्नदेखि लत्ता कपडासम्म, इलेक्ट्रोनिक सामानदेखि अन्य सेवाजन्य व्यापारसम्मका यहाँ ठूला ठूला डिलर तथा वितरक आएर बस्न पर्यो । अनि प्रदेशभरिका व्यापारी र उपभोक्ता यहीँ आएर सस्तो र सहज ढंगबाट किनबेच गर्न सक्ने गरी टावरलाई व्यसायिक बनाएर सञ्चालन गर्न आवश्यक रहेको उहाँको सुझाव छ ।
यो टावरमा दैनिक सयौ सर्वसाधारणले टिकट काटेर अवलोकन गरिरहेका छन् । साउन १ गतेबाट १ सय रुपैँया प्रवेश शुल्क लिएर सर्वसाधारणका लागि खुला गरिएको यो टावरमा दैनिक औसत २३५ जनाले अवलोकन गर्ने गरिरहेका छन् । यसको पूर्ण सञ्चालनपछि यो संख्या बृद्धि भएर जाने अपेक्षा सघन सहरी तथा भवन निर्माण आयोजनाका कम्प्यूटर अपरेटर सन्तोष नेम्वाङको रहेको छ ।
यो टावर २०७६ सालदेखि निर्माण सुरु भएको थियो । २०७६ साल असार २७ गते प्रधानमन्त्री केपी शर्मा ओलीले यसको शिलान्यास गर्नुभएको थियो । एक सय मिटर अग्लो यो कप्लेक्स १८ औं तलामा विभाजित छ । ७२ मिटर उचाइ कंक्रिट संरचनामा बनेको छ भने २८ मिटरमा मेटल फ्रेमको टावर रहेको छ । यो धरहराभन्दा अग्लो हो । कुल एक अर्ब ३८ करोड १८ लाख चार हजार पाँच सय ६९ लाग्ने सुरुको सम्झौता रहेकोमा परियोजना सम्पन्न हुँदा ५ दशमलव ४ प्रतिशत लागत मूल्य बढेको थियो । एक अर्ब ४५ करोडमा निर्माण सम्पन्न भएको हो ।
चिनियाँ कम्पनी जेडसीजीआईआईसी र आशिष ओम साइराम निर्माण कम्पनी जेभीले यो टावर निर्माणको जिम्मा पाएको थियो । यसको ०८१ मंसिर २३ गते प्रधानमन्त्री ओलीले उद्धघाटन पनि गरिसक्नु भएको छ । तर यो अझैसम्म व्यवसायिक रुपमा सञ्चालनमा भने आउन सकेको छैन ।
