दमक| २१ साउन | दमक नगरपालिकाले सवारी दुर्घटना न्यूनीकरण र ट्राफिक व्यवस्थापनलाई अझ प्रभावकारी बनाउने उद्देश्यले तिनपाङ्ग्रे सवारीसाधनहरू, सिटी सफारी र अटोरिक्सा माथि कडाइका साथ निगरानी सुरु गरेको छ।
नगरपालिकाले लामो समयदेखि सवारी सञ्चालनलाई नियमअनुसार व्यवस्थित गर्न निर्देशन दिएपनि केही चालकहरू बिना कागजात तथा अनुमति सवारी सञ्चालन गरिरहेको पाइएको छ। यही समस्यालाई समाधान गर्न दमक नगर प्रहरी र ट्राफिक प्रहरीको संयुक्त टोलीले दमक क्षेत्रका विभिन्न स्थानहरूमा सवारी चेकजाँच अभियान चलाएको हो ।
दमक नगरपालिकाको निर्देशन अनुसार अब सवारी साधन सञ्चालन गर्नका लागि सवारी लाइसेन्स, सवारी दर्ता प्रमाणपत्र (ब्लुबुक) र नगरपालिका कार्यालयबाट प्रदान गरिने स्टिकर अनिवार्य छ। यस्ता कागजात नभएका सवारीहरूलाई नियन्त्रणमा लिएर आवश्यक कानुनी प्रक्रिया अघि बढाइएको नगर प्रहरी प्रमुख रुद्रबहादुर कार्की बताउनुहुन्छ ।
दमक नगरपालिका यातायात तथा ट्राफिक व्यवस्थापन समिती संयोजक प्रजापति सापकोटा सार्वजनिक सुरक्षा पहिलो प्राथमिकता रहेकाले दुर्घटना न्यूनीकरण र सवारी नियमहरूको प्रभावकारी पालनाका लागि सबैको सहकार्य आवश्यक रहेको बताउनुहुन्छ । नगरपालिकाले चलाएको यो अभियान नगरवासीको सुरक्षालाई केन्द्रमा राखेर गरिएको उहाको धारणा छ ।
चेकजाँचको क्रममा करिब दर्जनभन्दा बढी सवारीसाधनहरूलाई कागजात अभावका कारण नियन्त्रणमा लिइएको थियो। नगरपालिकाले यो प्रक्रिया नियमितरूपमा अघि बढाउने जनाएको छ। नगर प्रहरी र ट्राफिक प्रहरीको सक्रियता र नगरपालिकाको समन्वयमा सञ्चालन गरिएको अभियान दमकका लागि अनुकरणीय बन्न सक्ने देखिन्छ।
नगरवासीको सक्रिय सहभागिता र सवारीधनीहरूको नियमपालनमार्फत मात्र सुरक्षित र व्यवस्थित यातायात प्रणालीको निर्माण गर्न सम्भव छ ।त्यसका लागि सरोकारवाला सबैले ध्यान सदन जरुरी देखिन्छ ।
