दमक, २१ साउन । नेपालमा वर्षा याम सुरु भएसँगै विभिन्न संक्रामक रोगहरू फैलिने खतरा बढ्दो छ । विशेष गरी पानीजन्य र सरुवा रोगहरूको जोखिम यस मौसममा उच्च हुने गर्छ ।
नियमित सरसफाइमा लापरबाही, दूषित खानेपानी, तथा चिसो र आद्रता युक्त वातावरणले भाइरस र ब्याक्टेरियाको वृद्धि सहज बनाउने हुँदा वर्षायाम रोगको दृष्टिले संवेदनशील मानिन्छ ।
झापाको दमकस्थित दमक अस्पतालमा मौसमी रोगका बिरामी भर्ना हुने संख्या वृद्धी भईरहेको छ । वर्षायाममा विशेष गरि पानीसँग सम्बन्धित रोगहरु बढि देखिने गरेको चिकित्सकको भनाई छ । वर्षा सुरु भएसगैँ दमकमा मात्र नभएर देशैभरि नै जन्डिस,डाईरिया,ज्वरो,रुगाखोकीको ,डेङ्गु लगायतका रोगहरुको संक्रमण उच्च रहेको दमक अस्पतालका फिजिसियन डा अनुपम घिमिरेले जानकारी दिनुभयो ।
कतिपय रोगहरु पानीका कारण हुन्छन् । अनी कतिपय चाहि हाम्रो लापर्वाही र हेलचेक्राईका कारण पनि हुने गरेका छन् ।
त्यसैले यस्ता रोगबाट बच्न डा. घिमिरे पानीलाई उमाल्ने, सेलाउने र सेवन गर्ने, शारिरिक सरसफाईमा ध्यान दिने जस्ता सुझाव दिनुहुन्छ ।
वर्षायामसँगै रोगको जोखिम बढ्नु प्राकृतिक प्रक्रिया हो। तर सावधानी, सजगता र समयमै उपचारबाट हामी यसबाट जोगिन सक्छौं। रोग लागेपछि उपचार गराउँदा लाग्ने समय, खर्च र पीडालाई ध्यानमा राखेर, पहिले नै सतर्क बन्ने हो भने वर्षायाम पनि स्वस्थ र सुरक्षित बनाईराख्न सकिन्छ।
