दमक ७ भदौ। धरानले माया धराने नामक बेसारका ब्राण्डीङ गरेर सार्वजनिक गरेपछि दमक नगरपालिकाले पनि बेसार उत्पादन गरेर दमकको बेसार नाम ब्राण्डीङ सुरु गरेको छ । दमकमा रहेका किसानहरुले उत्पादन गरेको बेसारलाई प्रशोधन गरेर आफ्नै नाम दिएर बजारमा ल्याउन थालीएको यो बेसार कत्तीको गुणस्तरीय र अर्गानीक छ त ?
न धेरै क्षेत्रमा उत्पादन, न नगरपालिकाको करोडौ लगानी । तर पनि दमकमा सुरु भयो दमकको बेसार । सेतो प्याकेटको आधा भाग पहेलो र माथील्लो ठाउँमा रातो इलिमेण्टमा सेतो रङ्गमा लेखिएको दमकको र हरियो पातमा सेतो रङ्गले लेखेको बेसार । दमकको बेसारको पहिचान यहीनै हो ।
तरमेरिक पाउडर लेखेर सुद्धता हाम्रो प्रतिवद्धता समेत उल्लेख गरिएको यो बेसार साँच्चै सुद्ध छ त ? यसको उत्पादन र बजारीकरणको जिम्मा लिएको दमक ९ स्थित सेतुमारी कृषि सहकारी सस्थाका व्यवस्थापक दिपक खनाल भन्नु हुन्छ ‘विषादी रहित उत्पादन हो । त्यसको प्रशोधनमा कुनै मिसावट छैन । त्यसकारण यो सुद्ध र मासावट रहित अर्गानीक बेसार हो । र अर्को महत्वपूर्ण कुरा बजारमा पाइने बेसार भन्दा यो सस्तो पनि छ ।
गत वर्षबाट दमक नगरपालिकाले यसखाले कार्यक्रम ल्याएपछि बाँझो बसेका तथा सुख्खा क्षेत्रका रुपमा रहेका जमिन बेसारमय हुन थालेका छन् । सो कार्यक्रम अन्तर्गत ४५ किसानले व्यवसायिक बेसार खेती दमकमा गरेका छन् । हाल करिब १६ बिगाहा जग्गामा दमकले आफैँ उत्पादन गर्न थालेको र यसलाई अझ बढवा दिएर जाने दमक नगरपालिकाका प्रमुख राम कुमार थापाले जानकारी दिनुभयो । उहाँले दमकको बेसारलाई दमकको पहिचान र समृद्धिसग जोडेर कार्यक्रम बनाइने पनि उल्लेख गर्नुभयो । दमकको चिनो र उपहारको रुपमा समेत प्रयोग गर्दै दमक र बेसारलाई पर्यायवाची बनाइने योजना रहेको नगर प्रमुख थापाले बताउनु भयो ।
बेसारको प्रवद्र्धनका लागि गत वर्ष नगरपालिकाले ५ लाख बजेट छुट्याएर कार्यक्रम थाल्यो । यो वर्ष पनि ५ लाख नै बजेट विनियोजन गरेर किसानको संख्या र खेतीको क्षेत्रफल बढाउँदै बीउ, मल तथा त्यसको प्रशोधन र ब्रान्डिङमा लगानी गर्ने कार्यक्रम छ । साहस नामक संस्थाले ब्रान्डिङमा प्राविधिक सहयोग गरेको र सेतुमारी कृषि सहकारीले बेसार संकलनको जिम्मेबारी लिएर काम गरिरहेको दमक नगरपापिलकाको कृषि शाखा प्रमुखद चन्दा भट्टराईले जानकारी दिनुभयो ।
