दमक| १२ भदौ | दमकस्थित ग्लोरी ब्यूटी पार्लर एण्ड द ब्युटी वर्ल्ड की सञ्चालिका गीता लिम्बुले आफ्नो जन्मदिन यस वर्ष पनि विशेष तरिकाले वृद्धाश्रममै मनाउनुभएको छ ।
बिहीबार उहाँले दमक चियादोकानमा रहेको रत्न जेष्ठ नागरिक वृद्धाश्रम सेवा केन्द्रमा पुगेर त्यहाँ बसोबास गर्ने बुबाआमाहरूसँग जन्मदिन मनाउनुभएको हो ।
जन्मदिनको अवसरमा उहाँले वृद्धवृद्धालाई भोजन खुवाउनुका साथै सिरानी, तन्ना र सिरानीका खोलजस्ता दैनिक जीवनमा आवश्यक पर्ने सामग्री हस्तान्तरण गर्नुभयो ।
यसअघि पनि ग्लोरी ब्यूटी पार्लर एण्ड द ब्युटी वर्ल्डले विभिन्न सामाजिक कार्यमा सक्रिय भूमिका खेलेको छ । तर जन्मदिनलाई वृद्धाश्रममै मनाउने परम्परा लिम्बुको खास विशेषता हो । वृद्धाश्रमका सञ्चालकहरूका अनुसार उहाँले हरेक वर्ष जन्मदिन यस्तै रूपमा यहाँका बुबाआमासँगै बिताउँदै आउनुभएको छ ।
“मैले कहिल्यै होटल वा रिसोर्टमा जन्मदिन मनाएको छैन । बरु यहाँ आउने हो, एकदिन भएपनि वृद्धाश्रममा रहेका बुबाआमालाई मिठो खुवाउने र थोरै भए पनि सहयोग गर्ने गर्छु,”
वृद्धाश्रमका सञ्चालकहरूले लिम्बुको यो कदमलाई सबैका लागि प्रेरणादायी भएको बताएका छन् । उनका अनुसार, यदि हरेक मानिसले यस्तै सोच राख्ने हो भने वृद्धाश्रममा रहेका बुबाआमाले हरेक दिन माया, सम्मान र मिठो खान पाउने थिए ।
